Batys Qazaqstanda jasóspirimderdi bopsalaǵan stýdentter ustaldy

Batys Qazaqstan oblysynda jasóspirimderdi bopsalaǵan stýdentter ustaldy, dep habarlaıdy Kazinform. 

BQO polıtsııa departamentiniń baspasóz qyzmetinen málim etkenindeı, Bórli aýdanynda jasóspirimdi qorqytyp, kúsh qoldaný arqyly aqsha bopsalaǵan 2007 jáne 2008 jylǵy eki kolledj stýdenti qolǵa tústi.

Kúdiktiler ýaqytsha ustaý ızolıatoryna qamaldy.

Sondaı-aq Oral qalasyndaǵy kolledjderdiń birinde oqıtyn stýdentter 500 myń teńge bopsalaǵany úshin ustaldy. Olar eki jasóspirimdi aqsha berýge májbúrlegen.

«Atalǵan derekter boıynsha QR QK 194-babyna sáıkes sotqa deıingi tergeý amaldary júrgizilýde. Bul bap boıynsha aıypty dep tanylǵandar 4 jylǵa deıingi merzimge bas bostandyǵynan aıyrylady. Sonymen qatar adamdar toby bolyp, aldyn ala sóz baılasqan jaǵdaıda 3 jyldan 7 jylǵa deıin bas bostandyǵynan aıyrylýy múmkin. Qazirgi kezde osyǵan uqsas derekterdi anyqtaý baǵytynda jumystar jalǵasyp jatyr», - dep habarlady vedomstvodan.

Departamentten túsken málimetke qaraǵanda, jasóspirimderdiń qaýipsizdigin qamtamasyz etý maqsatynda Oral qalasynyń barlyq oqý oryndarynda «Komek Stop Bulling ZKO» qosymshasy ornatylǵan. Sol arqyly stýdentter kómek suraı alady.

Jalpy, jyl basynan oblystaǵy bilim berý uıymdarynda 21 quqyq buzýshylyq anyqtalsa, qyrkúıek aıynan beri oqýshylar men kámeletke tolmaǵandardy bopsalaý boıynsha 4 derek tirkelgen.

Eske sala keteıik, budan buryn Oralda muǵalimniń oqýshyǵa qol kóterý deregi boıynsha tekserý júrgizilip jatqanyn jazǵan bolatynbyz.