Batys Qazaqstanda jańbyrly kúni jolǵa asfalt tóselgen
ORAL. KAZINFORM – Batys Qazaqstan oblysynda jańbyr jaýyp turǵanyna qaramastan, joldaǵy shuńqyrǵa asfalt tóselip jatqany jóninde áleýmettik jelide beınejazba tarady.
Beınejazbada áıel adam jol jóndeý jumysynyń osylaısha sapasyz júrgizilip jatqany jóninde aıtady.
«QazAvtoJol» UK» AQ BQO fılıaly 27 maýsym kúni respýblıkalyq mańyzy bar Atyraý-Oral jolynyń 349-shaqyrymynda shuńqyr jóndeý boıynsha josparly jumystar júrgizilgenin rastady.
Jol jabynynyń aqaýly ýchaskeleri kesilip, bıtým salynǵan. Alaıda asfaltbeton qospasyn tóseý kezinde jańbyr jaýyp ketken.
Qolaısyz aýa raıyna qaramastan, jol qozǵalysyna qaýip tóndirmeý jáne kólik quraldaryn kedergisiz ótkizý maqsatynda merdiger uıym jumysty bitirý jóninde sheshim qabyldaǵan. Áıtse de «QazAvtoJol» UK» AQ BQO fılıaly tehnologııalyq talaptarǵa saı kelmeýine baılanysty jańbyr kezinde jasalǵan jumys kólemin qabyldamady.
- Kelisim-sharttaǵy mindettemelerge sáıkes merdiger uıym – «QAJservıs» JShS BQO fılıaly anyqtalǵan kemshilikterdi joıý úshin óz qarajaty esebinen atalǵan ýchaskede asfaltbeton qospasyn qaıta tóseýdi mindetine aldy. Keshe jańbyr bolýyna baılanysty jumys búgin qaıtadan júrgizilýde. «QazAvtoJol» UK» AQ BQO fılıaly jol jóndeý jumystary kezinde aýa raıyn eskere otyryp, tehnologııalyq reglamenttiń saqtalýyna baqylaý sharalaryn kúsheıtetin bolady, - dep habarlady vedomstvodan.
Eske sala keteıik, budan buryn Batys Qazaqstanda shalǵaı aýyldarǵa asfalt jol qashan salynatynyn jazǵan edik.