Batys Qazaqstanda Jańaqala aýdanynyń aýyz sýsyz qalǵany ras pa
ORAL. KAZINFORM — Áleýmettik jelide Jańaqala aýdanynyń tórt kún boıy aýyz sýsyz otyrǵany jóninde aqparat jarııalandy.
Turǵyndar aptap ystyqta sýsyz qalǵanyna narazy. Osyǵan oraı Kazinform tilshisi máseleni oblys ákimdiginen anyqtap bilgen edi.
Oblys ákiminiń baspasóz qyzmetinen málim etkenindeı, Jańaqala aýdanyn aýyz sýmen qamtamasyz etetin Jańaqala toptyq sý qubyry jelisinde apattyq jaǵdaı boldy.
Qazirgi ýaqytta apattyq-qalpyna keltirý jumystary tolyq aıaqtaldy. Sý jınaqtaý jumystary jalǵasyp jatyr. Búgingi kúnge 1 200 tekshe metr sý jınaldy. Qosymsha 750 tekshe metr sý jınalǵan. Qazir rezervýarlardyń shamamen 50 paıyzy toltyrylǵan. Mamandardyń boljamynsha, aldaǵy 1-2 kún ishinde rezervýarlar tolyq tolyp, aýyz sý turaqty rejımde beriledi.
Osy kezeńde turǵyndardy aýyz sýmen qamtamasyz etý úshin sý táýligine úsh mezgil tómendegi keste boıynsha berilip jatyr:
tańerteń – 08.00-09.00;
túste – 13.00-14.00;
keshke – 17.00-18.00.
- Múmkindikke qaraı sý berý ýaqyty kezeń-kezeńimen ulǵaıtylatyn bolady. Qysymy tómen keıbir kóshelerge turǵyndardy sýmen qamtamasyz etý maqsatynda eki arnaıy tehnıka arqyly sý tasymaldaý uıymdastyryldy, - delingen resmı jaýapta.
Turǵyndardyń sózine qaraǵanda, mundaı jaǵdaı aýdan ortalyǵy Jańaqala aýylynda jáne Kópjasar aýyldyq okrýginde bolyp otyr.
Jańaqalada 9 myńnan astam, Kópjasarda 2 myńdaı halyq turady.
Eske sala keteıik, budan buryn Oral qalasynda saıajaılar jaryqsyz qalǵanyn jazǵan edik.
Sondaı-aq Oral qalasynda Han toǵaıy otqa orandy.
Oralda qatty turmystyq qaldyqtar polıgony órtenip jatyr.
