Batys Qazaqstanda jańadan 5 jaǵajaı ashý kózdelip otyr
ORAL. KAZINFORM – Batys Qazaqstan oblysynda sý aıdyndarynda turǵyndar shomylatyn 31 oryn belgilendi.
BQO TJD Azamattyq qorǵanys basqarmasynyń bastyǵy Rýslan Sharıevtiń málim etkenindeı, sonyń 10-y – kommýnaldyq, munyń beseýi balalar lagerlerinde ornalasqan. Sondaı-aq 21 jeke jaǵajaı bar.
Onyń sózine qaraǵanda, jańa qaýly jobasy jasalyp, oblys ákimdigine kelisýge joldandy. Soǵan sáıkes qosymsha 5 jaǵajaı ashý kózdelip otyr.
- Sý aıdyndarynyń túbin tekserý jáne tazartý ótinimderge jáne aldaǵy aptadan bastap bekitilgen kestege sáıkes júrgiziletin bolady. Kúni búginge deıin jaǵajaı ıelerinen 19 ótinish tústi. Oblysta 35 ramalyq-modýldik basseın bolsa, sonyń 21-i balalar lagerlerinde.Tótenshe jaǵdaılardyń aldyn alý maqsatynda departamentpen 5 mobıldi súńgýir toby, 28 júzý quraly (onyń ishinde 2 qutqarý, 15 metall motorly qaıyq jáne 11 úrlemeli rezeńke qaıyq), sondaı-aq 34 súńgýir jabdyǵy daıyndaldy, - deıdi R.Sharıev.
Onyń aıtýynsha, sý aıdyndarynyń qaýipti jáne jabdyqtalmaǵan ýchaskelerinde 279 tyıym salý belgisi men 44 aqparattyq banner ornatylǵan. Mundaı jerlerde qutqarýshylar patrýldeıtin bolady.
Departament derekteri boıynsha ótken jyly 16 adam sýǵa ketse, sonyń altaýy – balalar. Bıyl sý aıdyndarynda adam ólimi tirkelgen joq.
Jyl basynan beri sý aıdyndaryndaǵy qaýipsizdik qaǵıdalaryn buzǵany úshin QR Ákimshilik quqyq buzýshylyq týraly kodeksiniń 412-babyna sáıkes 8 adam jáne 1 zańdy tulǵa jaýapkershilikke tartylyp, olarǵa 143 518 teńge aıyppul salyndy. Mundaı quqyq buzýshylyq úshin jeke adamdarǵa 7 AEK (27 734 teńge), zańdy tulǵalarǵa 10 AEK (39 620 teńge) kóleminde aıyppul salý qarastyrylǵan.
- Sý aıdyndarynda adam óliminiń negizgi sebepteri tyıym salynǵan jáne jabdyqtalmaǵan jerlerde, sondaı-aq mas kúıinde shomylý, júze almaý, balalardy qaraýsyz qaldyrý ekendigi belgili. Sondyqtan qaýipsizdik qaǵıdalaryn umytpaý kerek, - dedi departamenttiń basqarma bastyǵy.
Eske sala keteıik, budan buryn BQO-da úsh Jaıyq ózenine batyp ketkenin jazǵan bolatynbyz.