Batys Qazaqstanda jańa fýtbol klýby quryldy
ORAL. KAZINFORM – Batys Qazaqstan oblysynda "Jaıyq" ataýymen jańa fýtbol klýby quryldy.
BQO dene shynyqtyrý jáne sport basqarmasynyń baspasóz qyzmetinen málim etkenindeı, jańa klýb burynǵy «Aqjaıyq» oıynshylary men jattyqtyrýshylarynyń jalaqy qaryzdaryn tóleýdi óz mindetine aldy.
«Aqjaıyq» fýtbol klýby 2024 jyly boryshkerler tizimine engen bolatyn. Sondyqtan klýb memlekettik satyp alýlarǵa qatysý quqyǵynan tolyq aıyrylyp, saldarynan 36 qyzmetker 2024 jyldyń qańtar-qazan aılary aralyǵynda jalaqysyn almaǵan.
QR Memlekettik eńbek ınspektsııasy komıtetiniń BQO boıynsha departamentiniń málimetinshe, qaryzdyń jalpy somasy 65,2 mıllıon teńge bolǵan.
- «Aqjaıyq» klýbynyń quryltaıshylaryna 10 aqpanǵa deıin demeýshiler men ınvestorlar esebinen máseleni sheshýge ýaqyt berilgenimen, jaǵdaı rettelmedi. Osyǵan baılanysty oblys ákimdigi jedel shara qarastyryp, «Jaıyq» fýtbol klýbyn qurý týraly sheshim qabyldady. Aldaǵy maýsymda «Jaıyq» Qazaqstan chempıonatynyń ekinshi lıgasynda óner kórsetedi. Sonymen qatar, klýbtyń jastar quramasy QJ League (Qazaqstannyń jasóspirimder lıgasy) týrnırine qatysýy múmkin. Jańa qurylǵan fýtbol klýby burynǵy ujym aldyndaǵy barlyq qarjylyq mindettemelerdi oryndap, óńirdegi fýtboldyń turaqty damýyn qamtamasyz etýdi maqsat etip otyr. Klýbtyń alǵa qoıǵan negizgi maqsattarynyń biri - balalar men jasóspirimder fýtbolyn damytýǵa erekshe nazar aýdarý, - dep habarlady vedomstvodan.
Eske sala keteıik, budan buryn «Aqjaıyq» fýtbol klýbynyń jattyqtyrýshylar men oıynshylarǵa 65 mln teńge qaryz ekendigin jazǵan edik.