Batys Qazaqstanda jaǵajaı sanyn 33-ke jetkizý kózdelip otyr
ORAL. KAZINFORM — Batys Qazaqstan oblysynda jyl basynan beri sý aıdyndaryna 855 reıd jasalyp, oǵan 2 myńnan astam adam tartyldy.
BQO TJD azamattyq qorǵanys basqarmasynyń bastyǵy Rýslan Sharıevtiń óńirlik kommýnıkatsııalar qyzmeti alańynda ótken brıfıngide málim etkenindeı, reıdter qorytyndysyna sáıkes 1 zańdy tulǵa jáne 3 adam QR Ákimshilik quqyq buzýshylyq týraly kodeksiniń 412-babyna sáıkes jaýapkershilikke tartylyp, 74 708 teńge aıyppul salyndy.
Onyń sózine qaraǵanda, bıyl avtokólik quraldarynyń qatysýymen 2 oqıǵa bolyp, sonyń saldarynan 4 adam abaısyzda sýǵa batyp ketti.
- Ótken jyly sý aıdyndarynda 13 adam sýǵa ketse, sonyń altaýy – balalar. Profılaktıkalyq jumystar barysynda 20 adam qutqarylsa, sonyń jeteýi – balalar. Adamdardyń sýǵa ketýiniń basty sebepteri – óz kúshin baǵalamaý, mas kúıinde shomylý, balyqshylardyń qaýipsizdik erejesin buzýy jáne balalardy qaraýsyz qaldyrý, - deıdi R.Sharıev.
Basqarma bastyǵynyń aıtýynsha, oblysta 31 jaǵajaı (10-y kommýnaldyq, 21-i jeke menshik) bolsa, 2024 jyly sonyń 12-si ǵana jumys istedi.
- Qazirgi tańda jaǵajaılar sanyn kóbeıtý maqsatynda departament ákimdiktermen birlesip, ruqsat etilgen oryndar tizimine túzetýler men tolyqtyrýlar engizýde. Jobaǵa sáıkes jaǵajaılar sanyn 33-ke jetkizý oılastyrylýda. Oral qalasynda qosymsha 2 jeke, Jánibek pen Terekti aýdanynda bir-birden kommýnaldyq jaǵajaı ashý kózdelýde. Báıterek aýdanynda 2 jeke jaǵajaı jabylyp, 1 kommýnaldyq orynǵa ruqsat etilmekshi. Jańaqala aýdanynda 1 kommýnaldyq jaǵajaı jabylýda, - dedi R.Sharıev.
Shomylý maýsymy kezinde tótenshe jaǵdaılardyń aldyn alý maqsatynda 72 qutqarýshy, 24 júzý quraly, 3 qaıyq jáne 15 patrýldik kólik daıyndaldy. Oǵan qosa reıdtik is-sharalarǵa TJD, polıtsııa departamenti jáne kóliktik baqylaý ınspektsııasynan 400-den astam adam jumyldyrylady. Sondaı-aq eriktiler uıymdaryn tartý josparlanýda.
Eske sala keteıik, budan buryn BQO-da jaz bastalmaı jatyp 8 adamnyń sýǵa ketkenin jazǵan bolatynbyz.