Batys Qazaqstanda zeınetke shyqqan 5 muǵalimge ótemaqy tólenbegen
ORAL. KAZINFORM — Batys Qazaqstan oblysynda Qaratóbe aýdany prokýratýrasy bilim berý uıymdarynyń qyzmetkerleri zeınetke shyqqan kezde zańnyń buzylǵanyn anyqtady.
BQO prokýratýrasynyń baspasóz qyzmetinen málim etkenindeı, QR Eńbek kodeksiniń 53-baby 9-tarmaǵyna sáıkes qyzmetker zeınetkerlik jasqa tolǵannan keıin eńbek shartyn buzbas buryn keminde bir aı buryn habardar etilip, ótemaqy tólenýi tıis.
Alaıda aýdannyń úsh mektebinde 2024 jyly 5 pedagog zeınetkerlik jasqa tolýyna baılanysty ótemaqy tólenbesten jumystan shyǵarylǵan.
— Qaratóbe aýdany prokýratýrasynyń aralasýynan keıin ǵana bes muǵalimge 400 myńnan astam teńge kóleminde ótemaqy tólendi. Kináli mektep dırektorlary tártiptik jaýapkershilikke tartyldy, - dep habarlady vedomstvodan.
Eske sala keteıik, budan buryn BQO-da sýbsıdııa berý kezinde memleketke 7 mıllıondaı teńge shyǵyn keltirilgenin jazǵan bolatynbyz.