Batys Qazaqstanda zańsyz qurylys salýdyń 28 deregi anyqtaldy

ORAL. KAZINFORM – Batys Qazaqstan oblysynda jyl basynan beri jospardan tys tekseris qorytyndysy boıynsha zańsyz qurylys salýdyń 28 deregi anyqtaldy.

BQO memlekettik sáýlet-qurylys baqylaýy basqarmasynyń basshysy Azamat Aǵeleýovtiń óńirlik kommýnıkatsııalar qyzmeti alańynda ótken brıfıngte málim etkenindeı, atalǵan derekter boıynsha 67 ákimshilik quqyq buzýshylyq týraly is qozǵalyp, 15,5 mln jýyq teńge aıyppul salyndy. 

Azamat Muratulynyń sózine qaraǵanda, ótken jyly 33 derek boıynsha 84 is qozǵalyp, 26,1 mln astam teńge aıyppul salynǵan edi.

- Bıyl QR Ákimshilik quqyq buzýshylyq týraly kodeksiniń 319-babyna (zańsyz qurylys) sáıkes 4 ákimshilik is qozǵaldy. Atap aıtqanda, J.Qabdolovqa qatysty Oral qalasy B.Momyshuly kóshesi 25-mekenjaıynda salynǵan kóppáterli turǵyn úı qurylysy sottyń sheshimimen májbúrlep buzylmaı, aıyppul salyndy. Sol sekildi A.Nurǵazınaǵa qatysty Derkól kenti Y.Altynsarın kóshesi 2/1-mekenjaıynda ornalasqan dúkenge japsarlas qurylys sot sheshimimen májbúrlep buzyldy. «MAKSIMA LTD» JShS Oral-Jelaev avtojoly boıynda gazben qamtý júıesin turǵyzǵan, buǵan aıyppul salyndy. I.Soltyhanov K.Meńdálıev kóshesi 16-mekenjaıynda kommertsııalyq ǵımarat salǵan. Sot ony májbúrlep buzý týraly sheshim shyǵardy, biraq apellıatsııalyq shaǵym qaralatyn bolady, - dedi A.Aǵeleýov.

Onyń aıtýynsha, bıylǵy ekinshi jartyjyldyqta QR sáýlet, qala qurylysy jáne qurylys salasyndaǵy zańnamalaryna jańa tujyrymdamalyq ózgerister, jedel den qoıý sharalary engizildi.

Jedel den qoıý sharalary memlekettik sáýlet-qurylys baqylaýy organdaryna jospardan tys tekseris barysynda nemese onyń qorytyndysy boıynsha nysanda júrgizilip jatyrǵan qurylys-montajdaý jumystaryn toqtatý (sýbektiniń qarjylyq qyzmetin toqtata turý - shottardy buǵattaý), qurylys materıaldaryn qoldanýǵa tyıym salý, sonymen qosa qurylys-montajdaý jumystaryn júrgizip jatyrǵan meriger uıymnyń lıtsenzııasyn toqtata turýǵa (aıyrýǵa) múmkindik beredi.

- Basqarma mamandary eldi mekenderde óz betimen qurylys salýǵa jol bermeý úshin turaqty túrde monıtorıng júrgizedi. Bul is-sharalar prokýratýra jáne jergilikti atqarýshy organdarmen birlese atqarylady. Monıtorıng nátıjeleri boıynsha zańsyz salynǵan qurylys nysandary boıynsha bekitilgen talaptarǵa sáıkes sharalar qabyldanyp, zańnamany buzýǵa jol bergender ákimshilik jaýapkershilikke tartylady, - dedi A.Aǵeleýov.

Eske sala keteıik, budan buryn Oralda qubyr jarylyp, qalanyń bir bóligi sýsyz qalǵanyn jazǵan bolatynbyz.