Batys Qazaqstanda zańsyz balyq tasymaldaǵan birneshe kúdikti ustaldy
ORAL. KAZINFORM — Batys Qazaqstan oblysynda «Bekire» jedel-aldyn alý is-sharasy aıasynda sý bıoresýrstarynyń zańsyz aınalymyna qatysty birneshe derekke tosqaýyl qoıyldy.
BQO polıtsııa departamentiniń baspasóz qyzmetinen málim etkenindeı, bir táýlik ishinde Atyraý-Oral avtojoly boıynda, sondaı-aq eldi mekender mańynda polıtsııa qyzmetkerleri úsh kólik quralyn toqtatty.
Atap aıtqanda, Atyraý-Oral avtojolynyń 374-shaqyrymynda Aqjaıyq aýdany Chapaev aýyly mańynda «Lada Largýs» avtokóligin basqarǵan 1973 jylǵy júrgizýshiniń tıisti qujattarsyz 273,5 kg balyq (taban, sazan, shortan) tasymaldaǵany anyqtaldy.
Sondaı-aq Terekti aýdany Shaǵataı aýyly mańynda júrgizýshiniń «VAZ-2110» avtokóligimen tıisti qujattarsyz shamamen 10 kg bekire tuqymdas balyq jáne 125 balyq (taban, sazan) alyp kele jatqany belgili boldy.
Oǵan qosa Atyraý-Oral avtojolynyń bir qıylysynda toqtatylǵan «ÝAZ» avtokóliginiń salony men júksalǵyshyn tekserý barysynda jalpy salmaǵy 28,5 kg balyq jáne 28 keliden astam ózen shaıandary tabylyp, tárkilendi.
— Anyqtalǵan barlyq derek boıynsha zańsyz balyq aýlaý jáne sý bıoresýrstarynyń aınalymyna qatysty baptarmen sotqa deıingi tergep-tekserý bastaldy. Qazirgi ýaqytta keltirilgen zalaldyń mólsheri anyqtalý ústinde. QR Qylmystyq is júrgizý kodeksiniń 201-babyna sáıkes ózge aqparat jarııa etýge jatpaıdy, — dep habarlady vedomstvodan.
Eske sala keteıik, budan buryn Oralda qylmys jasaǵan eki armenııalyq azamattyń bir jyldan keıin Erevanda ustalǵanyn jazǵan bolatynbyz.
