Batys Qazaqstanda veıpterdi zańsyz ákelgender sottaldy

ORAL. KAZINFORM — BQO boıynsha ekonomıkalyq tergep-tekserý departamenti Shekara qyzmetimen birlese otyryp, veıpterdi zańsyz ákelýdiń jolyn kesti.

Departamenttiń baspasóz qyzmetinen málim etkenindeı, Ý. esimdi azamat Reseı Federatsııasynyń shekara mańyndaǵy qalalarynyń birine barǵan kezde «WAKA» markaly 175 elektrondy temeki tutyný júıesin (veıp) satyp alyp, olardy memlekettik shekara arqyly alyp ótpek bolǵan.

Jasyryn túrde jetkizý úshin veıpterdi júrgizýshi men jolaýshylar oryndyqtarynyń astyna, júk salǵyshtyń tehnologııalyq qýystaryna, sondaı-aq qural-saımandar salynǵan sómkelerge ornalastyrǵan.

Alaıda atalǵan ónimder kólik quralyn memlekettik shekaradan ótý kezinde tekserý barysynda anyqtaldy.

Kináli tulǵa sottalyp, oǵan 300 AEK mólsherinde, ıaǵnı 1 mln 179,6 myń teńge kóleminde aıyppul salyndy.

Sol sekildi «WAKA» markaly 99 elektrondy temeki tutyný júıesin (veıp) zańsyz ákelgeni úshin H. esimdi turǵyn 500 AEK mólsherinde, atap aıtqanda, 1 mln 966 myń teńge kóleminde aıyppulǵa tartyldy.

- Ekonomıkalyq tergep-tekserý departamenti QR «Halyq densaýlyǵy jáne densaýlyq saqtaý júıesi týraly» kodeksiniń 110-baby 9-tarmaǵyna sáıkes, shegilmeıtin temeki buıymdaryn, elektrondyq tutyný júıelerin (veıpterdi), olarǵa arnalǵan hosh ıistendirgishter men suıyqtyqtardy ákelýge, óndirýge, satý, taratý maqsatynda saqtaýǵa, jóneltýge, tasymaldaýǵa, satýǵa jáne taratýǵa tyıym salynatyndyǵyn eskertedi. Atalǵan zańsyz áreketter úshin QR Qylmystyq kodeksiniń 301-1-babyna sáıkes qylmystyq jaýapkershilik kózdelgen. Ondaı qadamǵa barǵandarǵa eń joǵary jaza – múlkin tárkileı otyryp, 5 jylǵa deıin bas bostandyǵynan aıyrý kesilýi múmkin, - dep habarlady vedomstvodan.

Eske sala keteıik, budan buryn BQO-da saýda ústemesin asyra belgilegen 9 kásiporynnyń jaýapqa tartylǵanyn jazǵan edik.