Batys Qazaqstanda úıleri sýǵa ketken taǵy 23 otbasy baspanaly boldy
ORAL. KAZINFORM — Qazaqstan Respýblıkasynyń Konstıtýtsııasy kúni qarsańynda Terekti aýdany, Ańqaty aýylynda sý tasqynynan zardap shekken otbasylarǵa jańa úılerdiń kiltterin saltanatty túrde tabystaý rásimi ótkizildi.
Memleket basshysy Qasym-Jomart Toqaevtyń tapsyrmasyna Ańqaty aýylyndaǵy úıler «Jaıyqmunaı» JShS demeýshiligimen salyndy.
Merekelik sharaǵa Batys Qazaqstan oblysynyń ákimi Narıman Tóreǵalıev qatysty. Óńir basshysy aýyl turǵyndaryn qonys toıymen quttyqtap, jańa baspana kiltterin tabys etti.
«Memleket basshysy Qasym-Jomart Kemeluly Toqaevtyń tapsyrmasyna sáıkes sý tasqynynan zardap shekken halyqqa zań aıasynda tıisti kómek kórsetilýde. Kóktemgi sý tasqyny saldarynan Terekti aýdany boıynsha barlyǵy 160 úı apatty dep tanylǵan bolatyn. Soǵan oraı 30 baspana satyp alynyp, 130 úıdiń qurylysy júrgizildi. Qurylys jumystaryna qoldaý kórsetken demeýshiler men kompanııalarǵa shyn júrekten alǵysymdy bildiremin», - dedi Narıman Tóreǵalıev.
Ańqaty aýylynyń turǵyndary kórsetilgen qoldaýǵa rızashylyqtaryn bildirdi.
«Kóktemgi sý tasqyny otbasymyzǵa úlken shyǵyn ákeldi, biraq memleket bizdi apatpen jalǵyz qaldyrǵan joq. Mine, biz búgin jańa, keń, jaryq úıimizge kirip otyrmyz. Bizge qoldaý kórsetip, qamqorlyq tanytqan Memleket basshysyna myń alǵys», - dedi Ańqaty aýylynyń turǵyny Serikqalı Turalıev.
Búginge deıin oblysta myńnan astam turǵyn úı satyp alynyp, zardap shekken otbasylarǵa berilgen. Sondaı-aq sý tasqynynan zardap shekken Bórli, Syrym, Terekti, Báıterek aýdandarynyń turǵyndary 253 úıdiń kiltin aldy.
Jalpy, Batys Qazaqstan oblysynda zardap shekkender úshin 775 turǵyn úı salyndy.
Páter kiltterin berý 30 tamyz kúni Oral qalasynda jalǵasady.
Eske sala keteıik, budan buryn Oralda tasqynnan japa shekkenderge arnalǵan úıler qalaı salynyp jatqanyn jazǵan bolatynbyz.
