Batys Qazaqstanda úsh jylda 30-ǵa jýyq bala terezeden qulap ketken

ORAL. KAZINFORM — Batys Qazaqstan oblysynda 2022-2024 jyldary terezeden 26 balanyń qulaǵany tirkeldi.

BQO TJ departamenti tótenshe jaǵdaılardyń aldyn alý basqarmasynyń bastyǵy Nuraly Músıevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde ekeýi 2024 jyly Oral qalasynda kóz jumdy.

Onyń sózine qaraǵanda, 2022 jyly 8, 2023 jyly 7, ótken jyly 11 bala terezeden qulaǵan. 
Bıyl mundaı oqıǵa tirkelgen joq.

— Statıstıka kórsetkenindeı, balalardyń qulaýynyń basty sebebi — ata-anasynyń baqylaýsyz qaldyrýy jáne jaqyn mańdaǵy eresekterdiń beı-jaı qaraýy. 26 oqıǵanyń 20-sy saǵat 08.00-den keshki 20.00-ge deıingi aralyqta bolǵan. Bul balalardyń jumys ýaqytynda ashyq tereze men balkonnan qulaıtynyn baıqatady, — dedi N.Músıev.

Onyń aıtýynsha, 26 balanyń 10-y 1-3 jas, 15-i 4-7, bireýi 8-12 jas aralyǵynda bolǵan. Mundaı oqıǵanyń eń kóbi Oral qalasynyń (2022 jyly — 4, 2023 jyly — 7, 2024 jyly — 10) úlesine tıedi.

— Balalardyń qulaýynyń aldyn alý maqsatynda kópqabatty úılerde áleýmettik az qamtylǵan otbasylar páterlerinde tereze buǵattaǵyshtaryn ornatý jumystary júrgizilip jatyr. Bıyl jyl basynan beri 194 buǵattaǵysh ornatyldy, — dedi basqarma bastyǵy.

Eske sala keteıik, budan buryn Oralda bir kúnde eki balany kópqabatty úıdiń terezesinen qulap ketkenin jazǵan edik.