Batys Qazaqstanda úsh jasóspirim sýǵa ketip qaldy
ORAL. KAZINFORM — Batys Qazaqstan oblysy Jańaqala aýdany Jańaqazan aýyly mańyndaǵy Saryózende qaıǵyly oqıǵa boldy.
BQO TJ departamentiniń baspasóz qyzmetinen málim etkenindeı, 9 maýsym kúni keshkisin saǵat 18.25-te aýdandyq polıtsııa bóliminen 2009 jylǵy eki jáne 2008 jylǵy bir jasóspirimniń arnaıy jabdyqtalmaǵan ári shomylýǵa arnalmaǵan jerde sýǵa túsý kezinde batyp ketkeni týraly habar túsken.
Atalǵan aýmaqta sýǵa túsýge tyıym salynǵany týraly eskertý belgisi ornatylǵan.
- Oqıǵa ornyna Batys Qazaqstan oblysy tótenshe jaǵdaılar departamentiniń kúsh-quraldary jedel túrde jiberildi. Alaıda TJM bólimsheleri jetkenge deıin qaza bolǵandardyń deneleri jergilikti turǵyndardyń kúshimen sýdan shyǵaryldy. Qazirgi ýaqytta oqıǵanyń mán-jaıy men sebepteri anyqtalý ústinde. TJM arnaıy jabdyqtalmaǵan jáne shomylýǵa arnalmaǵan jerlerde sýǵa túsý adam ómiri men densaýlyǵyna úlken qaýip tóndiretinin eske salady. Sý aıdyndarynda tek resmı túrde ruqsat etilgen oryndardy tańdaý qajet. Qaýipsizdik talaptaryn qatań saqtap, balalardy qaraýsyz qaldyrmaý mańyzdy, - dep habarlady vedomstvodan.
Jasóspirimniń úsheýi de – bıylǵy mektep túlekteri.
Eske sala keteıik, budan buryn Oralda 9-synyp oqýshysy sýǵa batyp ketkenin jazǵan edik.
