Batys Qazaqstanda tutynýshylarǵa 35,5 mln teńge keri qaıtaryldy

Departament basshysynyń orynbasary Rýslan Ihsanovtyń óńirlik kommýnıkatsııalar qyzmeti alańynda ótken brıfıngte málim etkenindeı, qaralǵan ótinishter nátıjesinde tutynýshylarǵa 35 mln 521,274 myń teńge qarajaty qaıtaryldy. 

Rýslan Serǵalıulynyń sózine qaraǵanda, shaǵymdardyń basym bóligi (285) nemese 65,8 paıyzy bólshek saýda salasyna tıesili. Kóbine taýardy qaıtarýdan nemese almastyrýdan bas tartý, sapaǵa qatysty máseleler tirkeldi.

Elektrondy saýda boıynsha 42 ótinish tústi (9,8 paıyz). Negizgi másele — taýar sıpattamasynyń sáıkes kelmeýi, satýshy týraly aqparattyń bolmaýy jáne aqshany qaıtarýdaǵy qıyndyqtar.

Turmystyq qyzmetter salasynda — 41 ótinish (9,6 paıyz). Bul jıhaz daıyndaý, jóndeý, qurylys, sulýlyq salondary men turmystyq qyzmet kórsetý sapasyna qatysty.
Turǵyn úı-kommýnaldyq sharýashylyq salasy boıynsha 24 ótinish tirkeldi. Negizgi shaǵymdar tarıfterdiń ósýi men kommýnaldyq qyzmetterdiń sapasyna baılanysty boldy.

Sonymen qatar qoǵamdyq tamaqtandyrý, týrızm jáne baılanys salalary, bilim berý, medıtsınalyq, qarjylyq jáne kóliktik qyzmetter boıynsha 75 ótinish qaraldy.
Oǵan qosa departamentke túsken 118 ótinish ózge ýákiletti memlekettik organdardyń quzyreti sheginde qaraýǵa joldandy. Atap aıtqanda, bul salyq jáne qarjy zańnamasynyń buzylýy, tutynýshylardy aldaý derekteri, turǵyn úı qatynastary, baılanys, týrızm jáne kóliktik qyzmetter salalaryna qatysty.

Departament deregine sáıkes jyl basynan beri 73 ákimshilik shara qabyldanyp, 20 bıznes sýbektisine 1 mln 525 myń 562,5 teńge aıyppul salyndy.

— Tutynýshylar sondaı-aq elektrondy saýda jáne Instagram jelisi arqyly basqa qalalardan taýar men qyzmetke tapsyrys berýde. Osy rette olardyń quqyqtarynyń buzylý jaǵdaıy jıi kezdesedi. Mundaı shaǵymdar satýshylar, oryndaýshylardyń meken-jaıy boıynsha saýda jáne tutynýshylardyń quqyqtaryn qorǵaý departamentterine joldanady. Alaıda kóbine tutynýshylar taýarǵa tapsyrys bergende, satýshylardyń meken-jaıy men baılanys aqparatyn aldyn ala bilmeıdi, ıaǵnı taýar men satýshy týraly aqparatqa mán bermeıdi. Sonyń saldarynan taýar sapasy nemese ony qaıtarý máseleleri boıynsha narazylyqtar týyndap, bul protsester keıde qıyndyqtarǵa alyp keledi ári ınternet-saýdada aldanyp qalý qaýpi bar, — deıdi R.Ihsanov.

Onyń aıtýynsha, tutynýshylarǵa taýar nemese qyzmetke tapsyrys berer aldynda satýshynyń meken-jaıy men baılanys telefondaryn, taýar nemese qyzmettiń sapasyna qatysty pikirlerdi aldyn ala tekserip, satýshydan nemese oryndaýshydan sol týraly tolyq aqparat alý qajet. Qysqasha aıtqanda, tutynýshy óz tarapynan qajetti aqparatty alýy kerek. Qazirgi tańda mundaı múmkindikter bar. Internet arqyly ózderine qajetti aqparattarmen tanysa alady.

Eske sala keteıik, budan buryn BQO-da taýar baǵasyn asyryp satqan 140-tan astam kásipkerge aıyppul salynǵanyn jazǵan edik.