Batys Qazaqstanda turǵyn úıdegi órtter sany kóbeıip otyr
ORAL. KAZINFORM – Batys Qazaqstan oblysynda jyl basynan beri 20 órt oqıǵasy tirkeldi.
BQO TJ departamenti bastyǵynyń orynbasary Eldos Battalovtyń óńirlik kommýnıkatsııalar qyzmeti alańynda ótken brıfıngte málim etkenindeı, sonyń saldarynan 2 adam qaza tapsa, jaraqat alǵandar bolǵan joq.
Eldos Nurlanulynyń sózine qaraǵanda, ótken jyly osy merzimde 18 órt bolǵan edi. Bıylǵy órttiń 15-i turǵyn úı sektoryna tıesili. Bul ótken jyldyń osy kezeńimen (9) salystyrǵanda, edáýir artyq.
- 2025-2026 jylǵy jylytý maýsymyna oraı turǵyn úı sektoryndaǵy órtterdiń aldyn alýǵa arnalǵan profılaktıkalyq is-sharalar júıeli túrde júrgizilip keledi. Qazirgi ýaqytta halyqtyń áleýmettik osal toptaryna jatatyn 778 otbasy bolsa, olardyń turǵyn úılerine 703 ýly gaz datchıgi ornatyldy. Qamtý deńgeıi 90,3 paıyz boldy, - dedi E.Battalov.
Departament bastyǵynyń orynbasary turǵyn úı sektorynda órt qaýipsizdiginiń qarapaıym erejelerin qatań saqtaý kerektigin eske saldy.
Eske sala keteıik, budan buryn BQO-da órt bolǵan jerden eki adamnyń denesi tabylǵanyn jazǵan edik.