Batys Qazaqstanda tumaýmen aýyrǵandar sany 7,7 esege ósip ketti

ORAL. KAZINFORM — Batys Qazaqstan oblysynda bıylǵy úsh aıdyń qorytyndysy boıynsha epıdemıologııalyq ahýal turaqty dep baǵalanyp otyr.

BQO sanıtarııalyq-epıdemıologııalyq baqylaý departamentiniń basshysy Dınara Jańabergenovanyń óńirlik kommýnıkatsııalar qyzmeti alańynda ótken brıfıngide málim etkenindeı, óńirde asa qaýipti juqpaly aýrýlar – oba, sibir jarasy, týlıaremııa jáne búırek sındromdy gemorragııalyq qyzbanyń (BSGQ) tabıǵı oshaǵy bar. 

Onyń sózine qaraǵanda profılaktıkalyq is-sharalardyń nátıjesinde sońǵy on jyldan astam ýaqytta BSGQ-dan basqa atalǵan ınfektsııalardyń birde-bir jaǵdaıy tirkelgen joq.

- Bıylǵy úsh aıda oblys boıynsha BSGQ-nyń 10 deregi tirkeldi. Aýrý oshaqtarynyń barlyǵynda epıdemıologııalyq zertteý júrgizý, qarym-qatynasta bolǵandardy medıtsınalyq baqylaý jáne qorytyndy zalalsyzdandyrý jumystary nátıjesinde juǵý jaǵdaılary oryn alǵan joq. Brýtsellez, týberkýlez kórsetkishiniń tómendeýi baıqaldy. Bul – naýqaspen baılanysta bolǵandardy erte anyqtaý, oqshaýlaý sharalaryn der kezinde júrgizý isiniń jemisi, - dedi D.Jańabergenova. 

Departament basshysynyń aıtýynsha, 120 jiti ishek ınfektsııasy tirkelip, ótken jylǵy osy kezeńdegiden (195) 38,7 paıyzǵa azaıdy. 

Jiti respıratorlyq vırýstyq ınfektsııaǵa (JRVI) shaldyqqandar sany 6,5 paıyzǵa kemigenimen, esesine tumaýmen aýyrǵandar 7,7 esege (21-den 163-ke) ósti.

Úsh aıda qyzylsha juqtyrǵan 2 adam anyqtalyp, ótken jylǵydan (668) 335,2 esege tómendedi. 

- Epıdemıologııalyq jaǵdaıdy turaqtandyrý, juqpaly aýrýlardyń aldyn alý úshin turǵyndardy vaktsınatsııalaýdyń mańyzy zor ekeni belgili. Profılaktıkalyq ekpelermen joǵary deńgeıde qamtý ujymdyq ımmýnıtet qalyptastyrýǵa yqpal etedi. Osy oraıda 21 ınfektsııa boıynsha tıisti kontıngentterge josparly ekpe jumystary júrgizilýde, - dedi D.Jańabergenova.

Eske sala keteıik, budan buryn Batys Qazaqstanda kókjótelmen aýyrǵandar sany 4,3 esege kóbeıgenin jazǵan bolatynbyz.