Batys Qazaqstanda tumaýǵa shaldyqqandar sany 3 esege ósti
ORAL. KAZINFORM — Batys Qazaqstan oblysynda ótken jyldyń 1 qazanynan bastap 208 adamnyń tumaýmen aýyrǵany tirkeldi.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, bul aldyńǵy epıdemıologııalyq maýsymdaǵydan (2023-2024 jyl — 82) 3 esege artyp otyr.
Nurlybek Ermekulynyń sózine qaraǵanda, 1 qazannan beri bastapqyda tumaýdyń A tıpi tarap, 79 adam syrqattanǵan. Sonyń ishinde 73-inen H1N1 nemese shoshqa tumaýy anyqtalsa, altaýy H3N2 túrine shaldyqqan. Epıdemıologııalyq kezeńniń ortasynan bastap tumaýdyń V tıpi paıda bolyp, ol 129 adamnan tabyldy.
— Tumaýmen aýyrǵandar arasynda 19 júkti áıel bar. Sondaı-aq 37-si 4 jasqa deıingiler, 77-si 4-15 jas aralyǵyndaǵylar bolsa, 94-i — eresek adamdar, - deıdi N.Mustaev.
Onyń aıtýynsha, tumaý tárizdes emes vırýstardan 43 adenovırýs, 81 rınovırýs, 12 bokovırýs, 20 paragrıpp, 42 RS vırýs, 23 metapnevmovırýs, pandemııaǵa jatpaıtyn 27 koronavırýs deregi tirkeldi.
Tumaýǵa qarsy barlyǵy 69 466 adam ekpe alǵan, bul — oblys halqynyń 10 paıyzy.
— Bir aıta ketetin jaıt, osy merzimde jiti respıratorly vırýsty ınfektsııalarmen 120 988 adam naýqastanyp, aldyńǵy kezeńmen salystyrǵanda, 2 paıyzǵa tómendedi. Bulardyń 84 030-y 14 jasqa deıingi balalar bolsa, 601-i — júkti áıelder. JRVI jáne tumaýdyń aldyn alý úshin turǵyndarǵa saqtyq sharalaryn umytpaý kerektigin eske salamyz, - dedi departament basshysynyń orynbasary.
Eske sala keteıik, budan buryn Batys Qazaqstanda metapnevmovırýspen aýyrǵan 8 adamnyń teń jartysy balalar ekenin jazǵan bolatynbyz.