Batys Qazaqstanda toı korteji birden 15 aıyppul arqalady

ORAL. KAZINFORM — Batys Qazaqstan oblysynda Aqsaı-Shyńǵyrlaý avtojolynda polıtsııa qyzmetkerleri jol qozǵalysy erejelerin ádeıi buzǵan úılený toıynyń kortejin toqtatty.

BQO polıtsııa departamentiniń baspasóz qyzmetinen málim etkenindeı, Bórli aýdany polıtsııa bóliminiń qyzmetkerleri quqyq buzýshylardy anyqtap, júrgizýshiler men jolaýshylardyń barlyǵy ákimshilik jaýapkershilikke tartyldy. 

Birneshe Toyota Camry, VAZ-2110, Volkswagen jáne BMW avtokólikteri aıyp turaǵyna qoıyldy.

— Tekserý barysynda kólik salonynan tys jolaýshy tasymaldaý, qozǵalys kezinde jolaýshynyń kólikten tys bolýy, tıisti túrde tirkelmegen kólikti basqarý, zańsyz qaıta jabdyqtaý derekteri anyqtaldy. Barlyǵy 15 quqyq buzýshylyqtyń joly kesilip, tıisti sharalar qabyldandy, — dep habarlady vedomstvodan.

Eske sala keteıik, budan buryn Batys Qazaqstanda mektep avtobýsy jol apatyna ushyraǵanyn jazǵan edik.