Batys Qazaqstanda tasqynnan japa shekken 863 otbasy áleýmettik kómek aldy

ORAL. KAZINFORM — Batys Qazaqstan oblysynda sý tasqynynan zardap shekken turǵyndardan 3 847 ótinish qabyldandy.

BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Isqaqovanyń Kazinform tilshisine málim etkenindeı, sonyń ishinde 863 otbasyna 292,8 mln teńgege áleýmettik kómek kórsetildi.

Dildásh Salaýatqyzynyń sózine qaraǵanda, qalǵan ótinishter qaralýda, tolyq tekserýden keıin tólemder júrgiziledi.  

Oblys boıynsha sý tasqynynan zardap shekken azamattar úshin keshendi qoldaý sharalary atqarylýda.

«Jergilikti ókildi organdardyń sheshimderine sáıkes sý tasqynynan zardap shekkenderge jáne qıyn jaǵdaıǵa tap bolǵan azamattarǵa (otbasyna) 100 AEK mólsherinde (369 200 teńge) birjolǵy áleýmettik kómek kórsetý qarastyrylǵan. Bul maqsatqa jergilikti bıýdjetten jáne jergilikti atqarýshy organnyń shuǵyl shyǵyndarǵa arnalǵan rezerviniń esebinen qarajat bólý týraly oblys ákiminiń qaýlysy negizinde qarajat qarastyryldy» deıdi D.Isqaqova. 

Basqarma basshysy orynbasarynyń aıtýynsha, sonymen qatar Eńbek jáne halyqty áleýmettik qorǵaý mınıstrligi birinshi toqsanda ataýly áleýmettik kómekti alyp otyrǵan otbasylarǵa memlekettik organdarǵa júginýsiz avtomatty túrde ekinshi toqsanǵa taǵaıyndaýdy júzege asyrýda. 

Oblys boıynsha barlyǵy 1 097 otbasy AÁK alady.

Kúni búginge Bórli, Qaratóbe, Syrym, Terekti aýdandary jáne Oral qalasynda turatyn 628 otbasyna AÁK taǵaıyndaý boıynsha prolongatsııa jasaldy.

«Sondaı-aq tótenshe jaǵdaı kezeńinde oblys boıynsha 500 adamdy, onyń ishinde balalardy qosa alǵanda múgedektikke qaıta qaraý merzimi avtomatty túrde uzartyldy. Múgedektik boıynsha járdemaqy buryn belgilengen toptar boıynsha tólenedi. Jaǵdaı únemi baqylaýda» dedi D.Isqaqova.

Eske sala keteıik, budan buryn sý tasqynyna baılanysty BQO-da apattyq-qutqarý jumystaryna 8 200-den astam adam jumyldyrylǵanyn jazǵan edik.

Sondaı-aq Oraldyń qaýipti tustarynda 27 shaqyrymǵa jýyq bóget bıiktetilip jatyr.