Batys Qazaqstanda suıytylǵan gaz tapshylyǵy nelikten baıqalyp otyr

ORAL. KAZINFORM — Batys Qazaqstan oblysynda suıytylǵan munaı gazy tapshylyǵy únemi qaıtalanyp keledi.

BQO ákiminiń orynbasary Mıras Múlkáıdiń óńirlik kommýnıkatsııalar qyzmeti alańynda ótken brıfıngte málim etkenindeı, 1 tamyzdan bastap avtogaz baǵasy respýblıkanyń barlyq óńirinde qymbattaǵany belgili. Sonyń ishinde Batys Qazaqstan oblysynda lıtri 77-den 85 teńgege, shalǵaı aýdandarda 90 teńgege deıin ósti. 

Mıras Rústemulynyń sózine qaraǵanda, ár aıdyń aıaǵynda suıytylǵan gaz tapshylyǵy baıqalady. Maýsym, sodan keıin shildeniń sońǵy kúnderi sondaı tapshylyq bolǵany ras.

— Qazaqstanda Atyraý, Pavlodar jáne Shymkent munaı óńdeý zaýyttary suıytylǵan gaz óndiretini belgili. Elimizdegi gazdy tutyný kóleminiń 70-80 paıyzyn osy úsh zaýyt jabady. Olardyń bireýinde josparly jóndeý jumystary júrgizilgen kezde júkteme qalǵan zaýyttarǵa bólinedi. Sonymen qatar ózimizdiń oblystaǵy «Jaıyqmunaı» JShS-dan qajetti gazdy alyp otyrmyz, — dedi M.Múlkáı.

BQO energetıka, turǵyn úı-kommýnaldyq sharýashylyq basqarmasy basshysynyń mindetin atqarýshy Beıimbet Mýsınniń naqtylaýynsha, 2022 jyly gazben júretin avtokólik sany 15 650 bolǵan edi. Qazirgi kezde olardyń sany 26 387-ge jetti. 

— Bul úsh jyl ishinde gazben júretin kólikter sany 69 paıyzǵa kóbeıgenin kórsetedi. Sondyqtan tutyný mólsheri de artty. Bıylǵy jazda avtogaz quıý stantsııalarynda táýliktik satý kólemi 110 tonnadan 180 tonnaǵa deıin jetti. Mundaǵy ósim 63 paıyzdan asty. Bul rette óndiristik qýattar men resýrstyq baza sol deńgeıde qalyp otyrǵanyn atap ótý mańyzdy, — dedi B.Mýsın.

Basqarma derekterine qaraǵanda, bıylǵy jeti aıda óńirde ishki naryqta 33 193 tonna suıytylǵan munaı gazy satyldy. 

Eske sala keteıik, budan buryn Oralda júrgizýshiler suıytylǵan gaz tapshylyǵyna tap bolǵanyn jazǵan edik.