Batys Qazaqstanda sýǵa batqan 560-tan astam kıiktiń óleksesi joıyldy

ORAL. KAZINFORM — Batys Qazaqstan oblysy Kaztalov aýdany aýmaǵynda kıikterdiń Saryózenge batyp ólip jatqany jóninde áleýmettik jelide beınejazba tarady.

Turǵyndardyń sózine qaraǵanda, oqıǵa Qaraoba aýyldyq okrýgine qarasty Ábdiresh qystaǵy mańynda boldy.

Sol qystaq tusynda 157 bastaı kıik óleksesi sýda qalqyp júr.

- Basqa jerlerden de kıik ólekselerin kórýge bolady. Mal sý iship jatyr. Ol óz aldyna, Bostandyq sııaqty aýyldar tazartý qurylǵylary arqyly Saryózennen sý alyp, tutynady. Mundaı sýdan adamdardyń densaýlyǵyna qaýip tónbesine kim kepildik bere alady? Sondyqtan sýdyń quramyn tolyq zertteý qajet, - deıdi turǵyndar.

BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanov oqıǵany rastady.

- Habar búgin tústi. «Bókeıorda» tabıǵı rezervatynyń basshylyǵyna aıtyldy. Arnaıy top barady. Bul birinshi oqıǵa emes, ótken aptada sol aımaqtan sýǵa batqan 562 bas kıik óleksesi joıyldy. Kıikter ózennen árli-berli ótkende shyǵa almaı qalyp tur, - dedi Kazinform tilshisine ınspektsııa basshysy.

Eske sala keteıik, budan buryn Batys Qazaqstanda Muratsaı sý qoımasynan kıik ólekseleri tabylǵanyn jazǵan bolatynbyz.