Batys Qazaqstanda sý qoımalaryndaǵy jaǵdaı qalaı
ORAL. KAZINFORM — Batys Qazaqstan oblysynda «Qazsýshar» RMK sý qoımalaryna 399 mln tekshe metr sý jınaqtalyp, 72 paıyzǵa toldy.
«Qazsýshar» RMK Batys Qazaqstan fılıalynan málim etkenindeı, atalmysh mekeme Reseı Federatsııasynyń Orynbor jáne Saratov oblystarynyń sý sharýashylyǵy qyzmetterimen udaıy baılanysta.
Reseılik áriptesterdiń málimetine sáıkes qazirgi kezde Saratov oblysynda ornalasqan Prıýzen sý qoımasynan Qaraózenge sekýndyna 66 tekshe metr sý jiberilýde.
Bıyl munda eń joǵary sý jiberý kólemi sekýndyna 550 tekshe metrge jetken edi.
Kaztalov jáne Jańaqala aýmaqtarymen ótetin taǵy bir ózen — Saryózende sý tasqyny aıaqtaldy. Kúni búginge deıin qos ózenge 400 mln tekshe metrden astam tasqyn sýy alyndy.
Bul aǵyn sý lımandarǵa jáne tabıǵı shabyndyqtarǵa, sondaı-aq sý qoımalary men kólderdi toltyrýǵa baǵyttaldy.
«Qazsýshar» RMK Batys Qazaqstan fılıaly mamandarynyń habarlaýynsha, Oral qalasyndaǵy Shaǵan sý qoımasynda sýdyń deńgeıi — 29,40 metr.
Bul qoımanyń sý tastaǵysh ımmaraty 2023 jyldyń kúzinen bastap tolyq ashyq.
Tasqyn sý ımmarat arqyly erkin ótip, Jaıyq ózenine quıylýda.
Sýdy jazǵy-kúzgi mezgilderge saqtap qalý úshin atalǵan qurylym tasqyn mólsheri azaıǵan kezde jabylatyn bolady.
Shaǵan jáne Derkól ózenderiniń boıyndaǵy gıdrobeketterde sý deńgeıiniń tómendeýi baıqalady.
«Orynbor oblysynda ornalasqan Irıkla sý qoımasynan Jaıyq ózenine búgin tańmen saǵat 08.00-de sekýndyna 1 670 tekshe metr sý jiberilse, saǵat 16.00-de 1 324 tekshe metrge deıin azaıtyldy. Budan birneshe kún buryn Irıkladan sekýndyna 2 170 tekshe metr sý jiberilgen bolatyn. Jaıyq ózeniniń Oral qalasy tusyndaǵy deńgeıi qazirgi sátte 713 santımetrge (qaýipti shegi — 850 sm) jetti. Osyǵan deıin Jaıyqtaǵy sý deńgeıi jergilikti aǵyn jáne onyń orta aǵysynda ornalasqan salalarynyń sýynan kóterildi. Sáýir aıynyń ekinshi jartysynda Orynbor oblysyndaǵy Saqmar ózeni jáne Irıkla sý qoımasynan keletin sýdyń esebinen Jaıyqtyń deńgeıi eń joǵary shegine jetedi delinýde. Oblystyń bas ózeninen Jaıyq-Kóshim júıesine sekýndyna 102 tekshe metr sý túsýde. Qazirgi tańda sý qoımalaryna sý jınalýda, 8 sáýirden bastap kóltabandar men tabıǵı shabyndyqtarǵa sý berý bastaldy. Fılıaldyń sý sharýashylyǵy nysandarynda jaǵdaı turaqty» dep habarlady vedomstvodan.
Eske sala keteıik, budan buryn Jaıyq ózenindegi sý deńgeıi Oral qalasy gıdrobeketinde 710 santımetrge jetkenin jazǵan bolatynbyz.
Sondaı-aq sý tasqynyna baılanysty BQO-da turǵyndarǵa gýmanıtarlyq kómek kórsetilip jatyr.
