Batys Qazaqstanda sý basqan joldar qalaı qalpyna keltirilip jatyr
ORAL. KAZINFORM – Batys Qazaqstan oblysynda tasqyn kezinde joldardy sý shaıyp nemese jyryp ketken bolatyn. Qazirgi kezde bul joldar ne kúıde? Qalpyna keltirildi me? Mine, osy oraıda BQO jolaýshylar kóligi jáne avtomobıl joldary basqarmasynyń basshysy Baýyrjan Aıtmaǵambetov Kazinform tilshisine áńgimelep berdi.
Basqarma basshysynyń málim etkenindeı, bıylǵy kóktemde 31 avtokólik jolynyń 65 ýchaskesine sý shyǵyp ketti. Sondaı-aq 30 avtokólik jolynyń 74 ýchaskesinde sý jyrý derekteri tirkeldi.
Baýyrjan Esqaıyrulynyń tarqatqanyndaı, sonyń ishinde eki respýblıkalyq jolda 5 ýchaskede, alty oblystyq jolda 33 ýchaskede, 23 aýdandyq jolda 27 ýchaskede sý shyqty.
Oǵan qosa sý keıbir joldardyń júris bóligin jyryp ketti.
«Sonyń saldarynan óńirimizde 19 eldi mekende kólik baılanysy úzildi. Qazirgi ýaqytta 17 eldi mekende joldyń júris bólikteri qalpyna keltirilip, kólikter ol jerlermen júrip jatyr. Degenmen eki eldi mekende sý aǵysynyń toqtamaýyna baılanysty kólik baılanysyn qamtamasyz etýge ázirshe múmkindik joq. Atap aıtqanda, Terekti aýdanynda aýdandyq mańyzy bar Aqsoǵym jáne Aqjaıyqta Tasoba aýylyna kirme joldar sý toqtaǵan soń retteledi. Odan bólek, respýblıkalyq mańyzy bar Podstepnyı-Terekti-RF shekarasynyń 35-shaqyrymynda jáne oblystyq mańyzy bar 4 avtomobıl jolynda 5 ýchaskede joldyń júris bóligin sý shaıǵan edi. Kúni búginge deıin bul joldar bári de durystaldy» dedi B.Aıtmaǵambetov.
Onyń sózine qaraǵanda, 25 aýdandyq joldyń 68 ýchaskesin sý jyryp ketse, sonyń 57 ýchaskesi qalypqa keltirildi. Ázirge 11 ýchaske qalyp tur. Bul joldarda jóndeý jumystary júrgizilýde.
«Aýdandarda avtomobıl joldaryn retke keltirý jumystaryna „QazAvtoJol“ UK» AQ-nyń tehnıkalary da septigin tıgizdi. Avtomobıl joldarynyń tolyqtaı qalpyna keltirilýi úshin jergilikti atqarýshy organnyń tótenshe rezerviniń esebinen qarajat bólinetin bolady. Buzylǵan joldarǵa tıisinshe tehnıkalyq tekserister júrgizilip, jobalyq-smetalyq qujattamalar jasaqtalady. Sodan soń jóndeý jumystary atqarylady», dedi basqarma basshysy.
Eske sala keteıik, budan buryn Batys Qazaqstanda Kóshim kanalynda sý deńgeıi qaıta kóterilgenin jazǵan bolatynbyz.
