Batys Qazaqstanda sý basqan jerlerde ishek aýrýlary tirkelgen joq

ORAL. KAZINFORM - Batys Qazaqstan oblysynda jiti ishek ınfektsııalarymen syrqattanýshylyq boıynsha epıdemıologııalyq ahýal turaqty.

BQO sanıtarlyq epıdemıologııalyq baqylaý departamentiniń basshysy Muhamǵalı Aryspaevtyń brıfıngte málim etkenindeı, 30 naýryzdan bastap kúni búginge deıin sý tasqyny oryn alǵan Qaratóbe, Syrym, Bórli, Terekti aýdandarynda ishek aýrýlarymen shaǵymdanǵandar tirkelgen joq.

«Sý basqan jerlerden evakýatsııalanǵan halyqty tamaqtandyrýǵa jáne qolaıly jaǵdaı týǵyzýǵa erekshe kóńil bólinýde. Ýaqytsha ornalastyrý pýnktterinde aýmaqtyq basqarmalar mamandarynyń táýlik boıy kezekshiligi uıymdastyrylǵan. Pýnktterdi tazalaýdy ýaqtyly júrgizý, dezınfektsııalaý jáne jeldetý baqylaýda», - dedi M. Aryspaev.

Sonymen qatar brıfıngte «Batys sý arnasy» JShS dırektory Ánýar Arkenov sońǵy kúnderi áleýmettik jelilerde salqyn sýdyń lastanǵany týraly taralǵan aqparatty joqqa shyǵardy.

«Qazirgi ýaqytta sý tazartý qurylǵylary kesheni qalypty rejımde jumys istep jatyr. Salqyn sý taratý jelilerine beriletin sýdyń sapasy turaqty baqylaýda. Salqyn sýdy tazalap, zalalsyzdandyrýǵa qajetti hımııalyq zattardyń úsh aılyq qory bar», - dedi Á. Arkenov.

Eske sala keteıik, budan buryn sý basqan aýmaqtarda juqpaly aýrý juqtyrmaý úshin ne isteý kerek ekendigin jazǵan bolatynbyz.