Batys Qazaqstanda sý aıdynynda balyq tunshyǵyp jatqany ras pa
ORAL. KAZINFORM — Batys Qazaqstan oblysy Bórli aýdany Pýgachev aýyly tusynda sý aıdynynda balyqtyń tunshyǵyp jatqany jóninde áleýmettik jelide beınejazba jarııalandy.
Beınejazbada qazirgideı qys mezgilinde kóptegen sý aıdynynda ottegi jetispeýshiligi baıqalatyny, sondyqtan balyqty qorǵaý úshin oıyqtar jasap, oǵan qamys salý kerektigi aıtylady.
Osy oqıǵaǵa oraı Jaıyq-Kaspıı oblysaralyq basseındik balyq sharýashylyǵy ınspektsııasy jaýap berdi.
BQO boıynsha Balyq ınspektsııasy basqarmasynyń mamandary Bórli aýdany ákimdigi jáne Bórli aýdany orman jáne janýarlar dúnıesin qorǵaý KMM qyzmetkerlerimen birge beınejazbada kórsetilgen aýmaqqa barǵan.
Inspektsııa málimetine sáıkes monıtorıng jumystaryn júrgizý barysynda kúnniń sýytýyna baılanysty Shyńǵyrlaý ózeni eski arnasynyń betine qar jáne muz turǵandyqtan, sýdaǵy erigen ottegi mólsheri jetispeýshiliginen oıyqtarǵa balyq shabaqtarynyń tiri kúıinde jınalǵany anyqtaldy.
- Qazirgi kezde ınspektsııa mamandary jergilikti atqarýshy organdarmen birlesip, balyqtardyń tunshyǵý-qyrylýynyń aldyn alý úshin 3 motopompany paıdalana otyryp, sý aıdaý, sondaı-aq oıyqtar men úkilerdi oıý jumystaryn júrgizip jatyr. Aldaǵy ýaqytta Shyńǵyrlaý ózeniniń eski arnasyn ınspektsııa mamandary jáne jergilikti atqarýshy organnyń qyzmetkerleri kúnbe-kún baqylaıtyn bolady, - delingen resmı málimette.
Bórli aýdany Pýgachev aýyldyq okrýginiń ákimi Mereke Іzteleýov tıisti jumystar atqarylǵanyn aıtyp, kúni búgin jaǵdaıdyń qalypty ekendigin jetkizdi.
Eske sala keteıik, budan buryn Batys Qazaqstanda sý tasqynynan keler qaýip qandaı ekenin jazǵan bolatynbyz.