Batys Qazaqstanda stıhııalyq qoqys oryndarynyń basym kópshiligi joıylmaǵan

ORAL. KAZINFORM — Batys Qazaqstan oblysynda bıyl ǵaryshtan monıtorıngileý nátıjesinde 95 stıhııalyq qoqys orny anyqtaldy.

BQO tabıǵı resýrstar jáne tabıǵat paıdalanýdy retteý basqarmasynyń basshysy Marat Moldashevtiń málim etkenindeı, sonyń 35-i joıylǵan, bir oryn rastalmaǵan.

Onyń sózine qaraǵanda, stıhııalyq qoqys oryndaryn joıý kórsetkishi 37 paıyz bolyp otyr. Bul jumys jalǵasýda.

«Batys Qazaqstan oblysynda 147 qatty turmystyq qaldyqtar polıgony bolsa, sonyń 8-ine ǵana sanıtarlyq, ekologııalyq talaptarǵa sáıkes ruqsat qujattary resimdelgen. Bul – 5,4 paıyz. Polıgondardyń 145-i aýyldyq okrýgter ortalyqtarynda, ekeýi Oral jáne Aqsaı qalalarynda ornalasqan», - deıdi M.Moldashev.

Basqarma basshysynyń aıtýynsha, qatty turmystyq qaldyqtar polıgondaryn qoldanystaǵy normatıvtik talaptarǵa sáıkestendirý úshin jańa polıgondar salý qajet. Osy baǵytta Oral qalasy ákimdigi jańa polıgon salý úshin tehnıkalyq-ekonomıkalyq negizdeme daıyndap, memlekettik saraptamanyń oń qorytyndysy shyqty. Ótken jyly 101,8 mln teńgege jobalyq-smetalyq qujattama ázirleýge shart jasaldy, ol bıylǵy qyrkúıek aıynda daıyn bolady. Aqsaı qalasynda da osyndaı polıgon salý kózdelýde.

«Oral qalasynda qatty turmystyq qaldyqtar polıgonyn rekýltıvatsııalaýǵa jobalyq-smetalyq qujattama memlekettik saraptamadan ótkizildi. Jumys quny – 12 mlrd teńge. Sondaı-aq qazirgi ýaqytta Kaztalov aýdanynyń Kaztalov jáne Jalpaqtal aýyldarynda polıgon salý úshin jobalyq-smetalyq qujattamaǵa túzetý engizilýde», - dedi M.Moldashev.

Eske sala keteıik, budan buryn Oralda turmystyq qaldyqtar polıgonynda órttiń áli byqsyp jatqanyn jazǵan edik.

Sondaı-aq Batys Qazaqstanda 15 sý qoımasynyń jaǵdaıy talapqa saı bolmaı shyqty.