Batys Qazaqstanda stalkıng jasaǵan 2 adam sottaldy

ORAL. KAZINFORM – Batys Qazaqstan oblysynda eki er adamǵa qatysty stalkıng derekteri boıynsha úkim shyqty. 

BQO polıtsııa departamentiniń baspasóz qyzmetinen málim etkenindeı, alǵashqy jaǵdaı Bórli aýdanynda tirkeldi.

Aqsaı qalasynyń turǵyny polıtsııaǵa burynǵy tanysy tarapynan júıeli túrde qýdalaý men qorqytýǵa ushyraǵany týraly aryzdanǵan. Er adam jábirlenýshiniń úıi men jumys ornynyń mańynda jıi paıda bolǵan. Bir kúni ol áıeldi qolynan ustap, jerge qulatyp, kúsh qoldanýǵa áreket jasaǵan. Quqyqqa qaıshy áreketter kýágerlerdiń kómegimen toqtatyldy. Tergeý nátıjesinde qylmystyq is sotqa joldanyp, sottalýshy óz kinásin moıyndady. Sot oǵan úsh aı merzimge minez-qulqyna qatysty erekshe talaptar belgiledi. 

Ekinshi is Bókeı ordasy aýdany polıtsııa bóliminiń qyzmetkerleri tarapynan sotqa joldandy. Úkimdi Bókeı ordasy aýdandyq soty shyǵardy. Anyqtalǵandaı, 2025–2026 jyldar aralyǵynda er adam burynǵy jubaıyn júıeli túrde qýdalap, oǵan habarlamalar men áleýmettik jeliler arqyly qorqytý sıpatyndaǵy jazbalar jibergen. Onyń áreketteri jábirlenýshige eleýli psıhologııalyq zııan keltirgen. Sot er adamdy kináli dep tanyp, 100 saǵat qoǵamdyq jumysqa tartý jazasyn taǵaıyndady. 

– Batys Qazaqstan oblysy polıtsııa departamenti azamattardy adamnyń erkinen tys jasalatyn, qorqynysh pen mazasyzdyq týǵyzyp, qalypty ómirine kedergi keltiretin osyndaı áreketterge tap bolǵan jaǵdaıda dereý polıtsııaǵa habarlasýǵa shaqyrady. Stalkıng – zorlyq-zombylyq tikeleı qoldanylmasa da, adamnyń erkinen tys jasalyp, onyń psıhologııalyq jaǵdaıyna eleýli zııan keltiretin áreketter, - dep habarlady vedomstvodan.

Eske sala keteıik, budan buryn Batys Qazaqstanda veıpterdi zańsyz ákelgender sottalǵanyn jazǵan edik.