Batys Qazaqstanda sot sheshimimen jer daýyna núkte qoıyldy
ORAL. KAZINFORM — Batys Qazaqstan oblysynda B. degen turǵyn talap aryzben apellıatsııalyq sot alqasyna júgindi.
BQO sotynyń baspasóz qyzmetinen málim etkenindeı, atalǵan turǵyn óz ýchaskesiniń shekaralaryn birinshi bolyp úılestirgen irgeles menshik ıesi Sh-dan zańsyz basyp alǵan jerin úsh jyldan astam ýaqyt boıy qaıtara almaǵan.
Oblys sottaryna júgingenimen, memlekettik akt boıynsha naqty aýmaq pen ólshemniń sáıkes kelmeýine baılanysty talapkerge ýchaskeni úılestirýden bas tartylǵan. Sottar merzimin ótkizip alǵandyqtan jáne daýdyń sottylyǵynyń joqtyǵyna baılanysty onyń talaptary birneshe ret qaıtarylǵan.
Talapker ákimshilik sotqa talap aryzben júginip, kommertsııalyq emes aktsıonerlik qoǵamnyń Sh-ǵa jer telimin kelisý boıynsha áreketin zańsyz dep tanýdy suraǵan. Alaıda BQO mamandandyrylǵan aýdanaralyq sotynyń 2023 jylǵy 20 qarashadaǵy sheshimimen talap aryz qanaǵattandyrýsyz qaldyryldy.
Tek apellıatsııalyq sot alqasynyń bıylǵy 15 aqpandaǵy uıǵarymymen ǵana sot sheshimi buzylyp, talapkerdiń talaptary qanaǵattandyryldy.
Sot talqysynda anyqtalǵanyndaı, ákimshilik organ talapkerge ýchaskesin úılestirýge ruqsat berýden bas tartqan, sebebi jer teliminiń aýdany memlekettik aktide kórsetilgennen az. Sot bul jaǵdaı jaýapkerdiń óziniń kinásinen bolǵanyn anyqtady. Ol kórshiniń ýchaskesin kelisý kezinde talapkerdiń quqyq belgileıtin qujattaryn teksermeı, kelisimdi tek Sh-nyń múddesi úshin júrgizgen.
Jaýapkerdiń aıtýynsha, talapker óz aýmaǵyn birinshi bolyp úılestirgen Sh-nyń ýchaskesiniń shekarasyna sáıkes keltirý úshin óz ýchaskesiniń konfıgýratsııasyn ózgertip, onyń naqty aýdanyn azaıtýy kerek bolǵan.
Sot ákimshilik organnyń bul ustanymyn zańsyz jáne talapkerdiń quqyǵyn tikeleı buzady dep baǵalady.
Іsti apellıatsııalyq satyda qaraý barysynda taraptarǵa daýdy beıbit jolmen sheshý birneshe ret usynyldy. Kórshiler arasyndaǵy daý birneshe jyldan beri jalǵasyp kele jatqanymen, bul eki ýchaskeni qaıta kelisý arqyly sheshýge bolatyn edi. Áıtse de, Sh. tatýlasýdan bas tartty.
- Sottyń pikirinshe, talapkerdiń óz aýmaǵyn zań kýálandyratyn qujattarǵa sáıkes úılestirýge quqyǵy bar, biraq bul kórshi Sh. ýchaskesiniń shekarasyn qaıta qaraýsyz múmkin emes. Sondyqtan jaýapkerdiń Sh-nyń ýchaskesin úılestirýi zańsyz dep tanyldy. Apellıatsııalyq satydaǵy sottyń qaýlysy zańdy kúshine endi, - dep habarlady vedomstvodan.
Eske sala keteıik, budan buryn Oral qalalyq soty burynǵy tóraǵasynyń isi Tasqalada qaralatynyn jazǵan edik.