Batys Qazaqstanda synama alynǵan 94 ónimniń 31-i talapqa saı bolmaı shyqty
ORAL. KAZINFORM — Batys Qazaqstan oblysynda mamyr aıynda óńirdegi 13 saýda obektisinen baqylaý maqsatynda 94 ónim synamasy satyp alynyp zertteldi. Onyń ishinde 59-y taǵam ónimderi bolsa, 35-i - taǵamdyq emes ónimder.
BQO boıynsha sanıtarııalyq-epıdemıologııalyq baqylaý departamenti basshysynyń orynbasary Gúldana Kereevanyń málim etkenindeı, zertteý nátıjesinde 31 ónimniń belgilengen talaptarǵa sáıkes kelmeıtini anyqtaldy.
Onyń sózine qaraǵanda, sonyń ishinde 13 sáıkessizdik taǵam ónimderinen, al 18-i taǵamdyq emes ónimderden tirkeldi. Anyqtalǵan buzýshylyqtardyń basym bóligi ónimderdi tańbalaý talaptarynyń saqtalmaýyna baılanysty boldy.
- Sonymen qatar jarnamany baqylaý baǵytynda 63 monıtorıng júrgizilip, taǵam ónimderin jarnamalaýshylar arasynda túsindirý jumystary uıymdastyryldy. Mamandar tarapynan taǵam ónimderiniń qaýipsizdigi men jarnama talaptary boıynsha 477 aqparattyq-túsindirý is-sharasy ótkizildi. Anyqtalǵan zań buzýshylyqtarǵa baılanysty 7 jedel den qoıý sharasy qabyldandy, - dedi G.Kereeva.
Departament basshysy orynbasarynyń aıtýynsha, turǵyndardyń densaýlyǵyn qorǵaý jáne tutynýshylardyń quqyqtaryn qamtamasyz etýdiń mańyzy zor. Osy oraıda Eýrazııalyq ekonomıkalyq odaqtyń tehnıkalyq reglamentteri men biryńǵaı sanıtarııalyq-epıdemıologııalyq jáne gıgıenalyq talaptaryna sáıkes kelmeıtin ónimderdiń aınalymyn anyqtaý jáne oǵan jol bermeý maqsatynda monıtorıng turaqty júrgizilýde.
Turǵyndardyń ózderi de ónim satyp alý kezinde onyń tańbalanýyna, jaramdylyq merzimine jáne qaýipsizdik kórsetkishterine nazar aýdarǵan jón.
Eske sala keteıik, budan buryn undy qajetti dárýmendermen baıytýdyń mańyzy qandaı ekendigin jazǵan edik.
