Batys Qazaqstanda shoshqa tumaýyna shaldyqqan balalar sany 16 paıyzǵa kóbeıip ketken

ORAL. KAZINFORM — Batys Qazaqstan oblysynda epıdemıologııalyq maýsym bastalǵannan beri 14 jasqa deıingi 34 bala shoshqa tumaýymen aýyrǵan.

BQO sanıtarııalyq-epıdemıologııalyq baqylaý departamenti basshysy mindetin atqarýshy Nurlybek Mustaevtyń Kazinform tilshisine málim etkenindeı, bul ótken jylǵy osy kezeńdegiden (19) 16 paıyzǵa kóp.

Onyń sózine qaraǵanda, jalpy alǵanda, turǵyndardyń tumaýmen syrqattanýy 16 paıyzǵa tómendegen. Bıylǵy tirkelgen tumaýdyń barlyǵy – A tıpti túri (H1N1 shtammy), ıaǵnı shoshqa tumaýy.

«19 jeltoqsandaǵy málimet boıynsha oblysta 54 415 adamnyń jiti respıratorlyq vırýstyq ınfektsııalarmen (JRVI) aýyrǵany tirkelse, sonyń 40 472-si – 14 jasqa deıingi balalar. JRVI juqtyrǵandar sany 18 paıyzǵa azaıǵan. Alaıda bul kórsetkishtiń júkti áıelder arasynda óskeni baıqalady. Atap aıtqanda, ótken jyly 262 júkti áıel JRVI-men syrqattansa, bıyl olardyń sany 299-ǵa jetken. Departament kóktemge deıin sozylatyn epıdemıologııalyq maýsym kezinde juqpaly aýrýlardyń aldyn alý úshin saqtyq sharalaryn umytpaı, gıgıenalyq talaptardy oryndaý kerektigin eske salady», dedi N.Mustaev.

Eske sala keteıik, budan buryn JRVI-men aýyrǵan oqýshylar sany 2 myńǵa jýyqtaǵanyn jazǵan bolatynbyz.