Batys Qazaqstanda shomylýǵa arnalǵan 34 oryn belgilendi
ORAL. KAZINFORM — BQO ákimdiginiń «BQO sý obektileri men sý sharýashylyǵy qurylystarynda jappaı demalýǵa, týrızmge jáne sportqa arnalǵan oryndardy belgileý týraly» 2018 jylǵy 14 aqpandaǵy qaýlysyna túzetý júrgizildi.
BQO TJD tótenshe jaǵdaılardy joıý basqarmasynyń bastyǵy Baqytjan Ihsanovtyń málim etkenindeı, soǵan sáıkes oblys boıynsha shomylýǵa arnalǵan 34 oryn anyqtalsa, sonyń 13-i – kommýnaldyq, 21-i – jekemenshik.
Baqytjan Maǵzomulynyń sózine qaraǵanda, shomylýǵa arnalǵan oryndardyń kópshiligi Oral qalasy men Báıterek aýdanynda. Atap aıtqanda, Oralda 3 kommýnaldyq, 7 jeke, Báıterekte 1 kommýnaldyq, 14 jeke jaǵajaı bar.
Sý aıdyndarynyń túbin tekserý jáne tazartý kelip túsken ótinimderge jáne bekitilgen kestege sáıkes júrgiziledi.
- Ata-analardyń jaýapkershiligin arttyrý maqsatynda bilim basqarmasy sý aıdyndarynda adamdardyń qaza bolý statıstıkasy jáne qaýipsizdik qaǵıdalarynyń negizgi talaptary kórsetilgen jadynamalardy tabystaý jumystaryn júrgizip jatyr. Óńirde 39 ramalyq-modýldik basseın bar, onyń 21-i qala syrtyndaǵy balalar lagerlerinde, 18-i mektep janyndaǵy lagerlerde jumys jasaıtyn bolady, - deıdi B.Ihsanov.
Onyń aıtýynsha, tótenshe jaǵdaılardyń aldyn alý maqsatynda 81 qutqarýshy, 26 júzý quraly, 3 kater jáne 14 avtomobıl daıyndaldy. Qutqarýshylar shomylý kezinde sý aıdyndarynyń qaýipti jáne jabdyqtalmaǵan ýchaskelerin de nazardan tys qaldyrmaıdy.
Departament qyzmetkerleri polıtsııamen birlesip halyq arasynda jalpy sý aıdyndaryndaǵy qaýipsizdik qaǵıdalaryn buzýǵa jol bermeý, sondaı-aq balalardyń eresek adamdardyń baqylaýynsyz bolmaýy kerektigi týraly túsindirý jumystaryn turaqty negizde júrgizip keledi.
Ótken jyly oblysta barlyǵy 7 adam sýǵa batyp ketse, sonyń bireýi – bala.
Sý aıdyndarynda adam óliminiń negizgi sebepteri: tyıym salynǵan jáne jabdyqtalmaǵan jerlerde jáne mas kúıinde shomylý, júze almaý, sondaı-aq balalardy qaraýsyz qaldyrý.
Departament málimetine sáıkes sý aıdyndarynda qaýipsizdik erejelerin buzǵany nemese oryndamaǵany úshin QR Ákimshilik quqyq buzýshylyq týraly kodeksiniń 412-babyna sáıkes jeke adamdarǵa 7 AEK (27 734 teńge), zańdy tulǵalarǵa 10 AEK (39 620 teńge), mólsherinde aıyppul salynady.
BQO bilim basqarmasy basshysynyń orynbasary Saıagúl Ǵalıevanyń naqtylaýynsha, qazirgi tańda 382 mektepte 126 myńnan astam oqýshy bilim alyp jatyr. Jazǵy kezeńde olardyń bos ýaqytyn tıimdi uıymdastyrý jáne qaýipsizdigin qamtamasyz etý baǵytynda júıeli jumystar júrgizilý ústinde. Shomylý maýsymyna daıyndyq aıasynda bilim berý uıymdarynda 382 qaýipsizdik buryshy jańartylyp, sýdaǵy qaýipsizdik taqyrybynda 1 200-den astam synyp saǵaty men túsindirý kezdesýleri ótkizildi.
- Oblystaǵy lagerlerdiń kópshiligi balalardyń jazǵy demalysyn tıimdi uıymdastyrý maqsatynda 35 basseınmen qamtamasyz etilgen. Bul balalardyń densaýlyǵyn nyǵaıtyp, bos ýaqytyn paıdaly ótkizýine múmkindik beredi. Mektepterde 118 myńnan astam jadynama men aqparattyq paraqsha oqýshylar men ata-analarǵa taratyldy. Bul jumystarǵa tótenshe jaǵdaılar departamenti, polıtsııa jáne medıtsına salasynyń mamandary tartylyp jatyr. Jaz mezgilinde oblys boıynsha qala syrtyndaǵy 16, mektep janyndaǵy 365 lager men demalys alańy jumys isteıdi dep josparlanyp otyr. Onda 110 myńnan astam bala demalyspen qamtylady. Balalardyń qaýipsizdigin qamtamasyz etý maqsatynda sý aıdyndaryna jaqyn ornalasqan eldi mekenderdegi mektepterde qosymsha túsindirý jumystary kúsheıtildi, - dedi S.Ǵalıeva.
Eske sala keteıik, budan buryn BQO-da taǵy 2 jasóspirimniń sýǵa batyp ketkenin jazǵan bolatynbyz.
