Batys Qazaqstanda shekaradan zańsyz ótpek bolǵan sheteldikter ustaldy
Batys Qazaqstan oblysynda shekaradan zańsyz ótpek bolǵan sheteldikter ustaldy, dep habarlaıdy Kazinform tilshisi.
BQO polıtsııa departamenti baspasóz qyzmetinen túsken málimetke qaraǵanda, kóshi-qon qyzmeti basqarmasy qyzmetkerleri QR UQK Shekara qyzmeti BQO boıynsha departamentimen birlese otyryp, 21 jastaǵy sheteldik qolǵa tústi.
Qazaqstannan Reseıge shekarany zańsyz jaıaý kesip ótpek bolǵan jigittiń jeke basyn kýálandyratyn qujattary joq bolyp shyqty.
Jaýap alý kezinde ol 2022 jyly Mysyr eline Serra-Leone Respýblıkasynan bosqyn retinde kelgenin aıtty. Bosqyn vızasynyń merzimi ótkennen keıin jigit Mysyr shekarasynan Túrkııaǵa zańsyz ótken. Sodan keıin Armenııa, Túrikmenstan, Ózbekstan shekarasynan zańsyz ótip, Qazaqstan aýmaǵyna kelgen.
«Shymkent, Almaty qalalarynda bolǵan ol «Oralda turǵyn úımen jáne jumys isteýge kómektesemin» degen dosymen Aqtóbe qalasyna avtobýspen kelgen. Sol qyzmeti úshin 2 myń dollar tólegen. Alaıda ol óziniń aldanǵanyn túsindi. Qazirgi kezde ustalǵan sheteldik Oral qalasy polıtsııa basqarmasy qabyldap-taratý ornyna ornalastyryldy. Atalǵan derek boıynsha materıal jınaqtalyp, sheshim qabyldaý úshin Oral qalasy mamandandyrylǵan ákimshilik sotyna joldandy», dep habarlady vedomstvodan.
Polıtsııa departamentiniń málimeti boıynsha sondaı-aq memlekettik shekarany zańsyz kesip ótý kezinde Iemen Respýblıkasynyń 4, Sırııanyń 3 azamaty ustaldy. Bular QR Ákimshilik quqyq buzýshylyq týraly kodeksiniń 514-baby 2-bóligine sáıkes ákimshilik jaýapkershilikke tartylyp, Bórli aýdandyq sotynyń sheshimimen elden shyǵaryldy.
Eske sala keteıik, budan buryn Batys Qazaqstanda joǵalyp ketken 700 bas qoı túgel tabylǵanyn jazǵan bolatynbyz.
