Batys Qazaqstanda shegirtkege qarsy kúres jumystary qalaı júrgizilip jatyr
ORAL. KAZINFORM – Batys Qazaqstan oblysynda saıaq jáne úıirli shegirtkelerge qarsy kúres jumystary júrgizilýde.
BQO aýyl sharýashylyǵy basqarmasy basshysynyń mindetin atqarýshy Rústem Zulqashevtiń Kazinform tilshisine málim etkenindeı, bıyl saıaq shegirtkelerge qarsy oblystyq bıýdjet esebinen 551 mln teńgege 95,8 myń gektar jer óńdelýi tıis.
Rústem Múlkáıulynyń sózine qaraǵanda, saıaq shegirtkelerge qarsy jer óńdeıtin mekemeler anyqtaldy. Atap aıtqanda, «ZapKazFýmıgatsııa» JShS (basshysy Jasulan Saǵat) Terekti, Jánibek, Aqjaıyq, «Magtoksın» JShS (Danııar Bazarbaev) - Báıterek, Bókeı ordasy, Jańaqala, Bórli, Kaztalov, Syrym, Tasqala aýdandarynda jáne Oral qalasynda óńdeý júrgizetin bolady.
«Respýblıkalyq fıtosanıtarlyq dıagnostıka jáne boljamdaý ádistemelik ortalyǵynyń oblystyq fılıaly mamandarynyń aqparaty boıynsha qazirgi ýaqytta Aqjaıyq, Jánibek, Báıterek, Tasqala, Shyńǵyrlaý, Terekti, Bókeı ordasy, Bórli, Kaztalov, Syrym aýdandarynda saıaq shegirtkeler dernásilderi jappaı jandandy. Kúni búgin 10 700 ga jer zerttelse, sonyń ishinde Aqjaıyq aýdanynda 1 300, Báıterekte 5 650 gektarda shegirtke dernásilderiniń kólemi ekonomıkalyq zııandy sheginen asqan. Osyǵan baılanysty Aqjaıyqta usaq baqsha sharýashylyqtarynda 50 ga óńdeldi, jumystarǵa 5 adam qatysty. Báıterekte jańbyrǵa baılanysty óńdeý jasalmady. Tehnıkalar sol jaqta bolady, qolaıly sátte jumysqa kirisedi», - deıdi R.Zulqashev.
Onyń aıtýynsha, jyldaǵy tájirıbe boıynsha aýdandaǵy mamandar tehnıkalardy qarsylap, óńdeý kezinde birge bolýy qajet. Sondaı-aq óńdeý jumystary júretini týraly turǵyndar habardar etilýi tıis.
Saıaq shegirtkeler mekendegen alqaptardy zertteıtin, óńdeýden keıin bıologııalyq tıimdilikti anyqtaıtyn komıssııa quramy oblys ákimdiginiń 2021 jylǵy 11 maýsymdaǵy №110 qaýlysymen bekitilgen. Komıssııa quramyna aýyldyq okrýgtiń ákimderi, jer qatynastary bóliminiń jáne boljamdar ádistemelik ortalyǵynyń mamandary kiredi, komıssııa tóraǵasy – aýdandyq aýyl sharýashylyǵy bóliminiń basshysy.
Rústem Zulqashevtiń málimdeýinshe, oblys aýmaǵynda úıirli shegirtkelerge qarsy respýblıkalyq bıýdjet esebinen 113,5 myń ga jerde hımııalyq óńdeý josparlanýda. Sonyń ishinde ıtalııalyq prýstan 112,0 myń ga jáne azııat shegirkesinen 1,5 myń ga jer óńdeledi.
Úıirli shegirtkelerge qarsy hımııalyq óńdeý jumystaryn júrgizýge qajet pestıtsıdter oblys aýmaǵyna jetkizildi. Óńdeý jumystaryn «Magtoksın» JShS men «AgroSLA» JShS mekemeleri júrgizedi.
«Úıirli shegirtkelerdi óńdeý jumystary bastalyp ketti. 7 maýsymdaǵy málimet boıynsha oblysta 45 myń gektarǵa jýyq jer óńdeldi, bıologııalyq tıimdiligi oń nátıje kórsetýde. Hımııalyq óńdeý jumystaryna 33 adam 9 tehnıkamen qatysýda. Jumystar jappaı bastalǵanda 151 adam, 88 tehnıka jumyldyrylatyn bolady. Oblystyń barlyq aýdandarynda shegirtkege qarsy kúresý jumystaryn úılestiretin shtabtar quryldy, búginge deıin aýdandarda barlyǵy 11 shtab otyrysy ótkizildi. Sonymen qatar osy kezge deıin oblystyq shtabtyń tórt otyrysy bolyp, atqarylǵan jumystar jóninde esep berilip, aldaǵy josparlar talqylandy», - dedi R.Zulqashev.
Óńirde keı jerlerde shegirtkelerdiń boı kórsete bastaýy mal baqqan aǵaıyndy da alańdatyp otyr. Sharýalar shegirtkimen kúrestiń ýaqtyly, keshiktirilmeı jáne sapaly júrgizilgenin qalaıdy.
