Batys Qazaqstanda Shaǵandaǵy sý deńgeıi bir táýlikte 88 santımetrge joǵarylady

ORAL. KAZINFORM — Batys Qazaqstan oblysynda ózenderdiń basym kópshiliginde sý deńgeıi kóterildi.

«Qazgıdromet» RMK BQO fılıalynyń búgin tańdaǵy málimeti boıynsha Jaıyq ózeni Oral qalasyndaǵy gıdrobekette bir táýlikte 26 sm joǵarylap, 215 santımetrge (qaýipti shegi — 850 sm) jetti.

Jaıyqqa quıatyn Shaǵan ózeni Báıterek aýdany Chývashın aýyly tusynda 631 sm (+88 sm, qaýiptisi — 1 280-1 300 sm), Oral qalasyna jaqyn ornalasqan Mıchýrınde 274 santımetrdi (+53 sm, 1 100 sm) kórsetti.

Derkól ózeni deńgeıi Tasqala aýylynda keshegiden 2 sm tómendegenimen, Báıterek aýdany Zelenyı eldi mekeninde 359 sm (+55 sm, 450 sm), Beleste 499 santımetr (+68 sm, 600-650 sm) boldy.

Tasqala aýdanynda keshe qaýipti shekten (780 sm) asyp ketken 2-Shejin ózeniniń qarqyny báseńdep, birden 73 santımetrge (qazir — 728 sm) túsken.

Shaǵyn ózenderdiń ishinde Kópirańqatynyń erekshe «týlap» jatqany baıqalady. Munda Alǵabas aýyly tusynda bir táýlikte 179 sm kóterilip, 384 santımetrden (qaýipti shegi — 945 sm) bir-aq shyqqan.

Eske sala keteıik, budan buryn BQO-da Derkóldegi sý deńgeıi Tasqala tusynda qaýipti shekke jaqyndaǵanyn jazǵan bolatynbyz.