Batys Qazaqstanda Shaǵan ózeninen ótetin kópir jabylady
ORAL. KAZINFORM — Batys Qazaqstan oblysynda halyqaralyq mańyzy bar Aqtóbe-Oral-RF shekarasy («Syrym» avtokólik ótkizý beketi) avtojolynyń 247-shaqyrymyndaǵy Shaǵan ózeni arqyly ótetin kópirde qalpyna keltirý jumystary júrgiziledi.
«QazAvtoJol» UK» AQ BQO fılıalynan málim etkenindeı, osyǵan baılanysty bıylǵy 26 shilde kúni saǵat 05.00-den 11.00-ge deıin kópir barlyq avtokólik túrleri úshin jabylady.
— Osyǵan oraı júrgizýshilerden ýaqytsha qolaısyzdyqtarǵa túsinistikpen qarap, jol júrý baǵytyn aldyn ala josparlaýdy suraımyz. Jóndeý jumystary kezindegi qaýipsizdikti «QazAvtoJol» UK» AQ BQO fılıaly jáne Batys Qazaqstan oblysy polıtsııa departamenti ákimshilik polıtsııa basqarmasy uıymdastyratyn bolady, — delingen resmı habarlamada.
Eske sala keteıik, budan buryn BQO-da jaıaý júrginshi bóligi qulaǵan kópirdi zertteý jumystary bastalǵanyn jazǵan edik.
