Batys Qazaqstanda Shaǵan ózenindegi sý deńgeıi bir táýlikte 81 santımetrge kóterildi
ORAL. KAZINFORM — Batys Qazaqstan oblysynda Jaıyq ózenindegi sý deńgeıi sońǵy táýlikte joǵarylady.
«Qazgıdromet» RMK BQO fılıalynyń málimetine qaraǵanda, oblystyń bas ózeni sońǵy táýlikte Bórli aýdany Jarsýat aýylyndaǵy gıdrobekette 359 (+32, qaýipti shegi — 1 myń sm), Báıterek aýdany ıAnvartsevte 289 (+24), Kóshimde 286 (+69), Aqjaıyq aýdany Mergende 393 (+20), Taıpaqta 123 (+6) santımetrdi kórsetti.
Tek Oralda ǵana keshegi deńgeıde (254 sm) qaldy. Qazirgi tańda Jaıyq ózeninde seń júrip jatyr.
Jaıyqtyń salasy Shaǵanda sý deńgeıi Báıterek aýdany Chývashın aýylynda birden 81 santımetrge kóterilip, 878 sm (qaýipti shegi — 1 300 sm) boldy. Kerisinshe Mıchýrın aýyly tusynda 1 santımetrge (444 sm) tómendedi.
Sonymen qatar Shyńǵyrlaý ózeni Bórli aýdany Keńtúbek aýyly tusynda bir táýlikte 12 santımetrge (355, qaýipti shegi — 700 sm) kóterilgen.
Kaztalov aýdanynda Qaraózen men Saryózende muzdyń erip jatqany baıqalady.
Eske sala keteıik, budan buryn BQO-da Jaıyq pen Shaǵannan basqa ózenderde aǵys qarqyny báseńdegenin jazǵan edik.
