Batys Qazaqstanda segiz jaǵajaı qaýipsizdik talaptaryna saı kelmeı tur

BQO TJD tótenshe jaǵdaılardy joıý basqarmasy bastyǵynyń mindetin ýaqytsha atqarýshy Aıbar Qamıdýllıevtiń óńirlik kommýnıkatsııalar qyzmeti alańynda ótken brıfıngte málim etkenindeı, óńirde sý aıdyndarynda 34 buqaralyq demalys, týrızm jáne sport orny belgilense, sonyń 13-i – kommýnaldyq, 21-i – jeke jaǵajaı. 

Aıbar Haıdarulynyń sózine qaraǵanda, ótinimderge sáıkes 25 mamyrdan bastap jaǵajaılardyń túbin tekserý jáne tazartý jumystary júrgizildi. 

- Qazirgi ýaqytta barlyǵy 22 jaǵajaı qaraldy. 14 jaǵajaıdyń (3 kommýnaldyq jáne 13 jeke) jumys isteýine ruqsat berildi. Al 6 kommýnaldyq jáne 2 jeke jaǵajaıdyń sý aıdyndaryndaǵy qaýipsizdik talaptaryna sáıkes kelmeýine baılanysty jumysyna ruqat etilmedi. Bul jaǵajaılar qaǵıdalardyń talaptaryna sáıkes kelgen soń qaıta beriletin ótinimderge saı qaralatyn bolady, - dedi A.Qamıdýllıev.

Onyń aıtýynsha, oqýshylardyń sýdaǵy qaýipsizdigin qamtamasyz etý jáne júzý daǵdylaryn qalyptastyrý úshin oblysta 5 jabyq jáne 34 modýldik qańqaly basseın bar. Shomylý maýsymynda tótenshe jaǵdaılarǵa den qoıý maqsatynda 6 mobıldi súńgýir toby, 80-nen astam qutqarýshy, 30-ǵa jýyq júzý quraly jáne 14 avtomobıl, súńgýir jabdyqtarynyń 24 jıyntyǵy daıyndaldy. 

Departament qyzmetkerlerimen patrýldeý kún saıyn bekitilgen kestege sáıkes sý aıdyndarynyń qaýipti jáne jabdyqtalmaǵan ýchaskelerinde júrgiziledi. Oǵan qosa TJM 20982-áskerı bóliminiń 2 qutqarý batalonynyń 10 áskerı qyzmetshisi belgilengen 5 orynda kúndelikti kezekshilik atqarady.

- Bıyl shomylý maýsymy kezinde 4 adam sýǵa ketse, sonyń úsheýi – balalar. Ótken jyly osy merzimde eki jasóspirim qazaǵa ushyraǵan edi. 4-6 shilde aralyǵynda Ákimshilik quqyq buzýshylyq týraly kodeksiniń 412 jáne 440-babyna sáıkes jalpy somasy 469 262,5 teńge bolatyn 31 hattama toltyryldy. Jyl basynan beri 141 adamǵa 2,1 mln astam teńge kóleminde aıyppul salyndy, - dep qosty A.Qamıdýllıev.

Eske sala keteıik, budan buryn Batys Qazaqstanda úsh jasóspirimniń sýǵa ketip qalǵanyn jazǵan edik.