Batys Qazaqstanda saýda salasynda 5 iri jobany júzege asyrý kózdelip otyr

ORAL. KAZINFORM – Batys Qazaqstan oblysynda 2 mlrd teńgege jańadan saýda úıleri men keshenderi, sýpermarketter salynbaq. 

BQO kásipkerlik jáne ındýstrıaldyq-ınnovatsııalyq damý basqarmasy kásipkerlik jáne saýda bóliminiń basshysy Meıram Qabdyǵalıevtiń málim etkenindeı, 5 iri joba júzege asqan kezde 50-den astam jańa jumys orny ashylmaq.

Onyń sózine qaraǵanda, «Batys Kapıtal Lımıted» JShS kóterme jáne bólshek saýda keshenin, «Omarov» JK, «Ýmırgalıev» JK jáne «Sauna Prov» JShS saýda úılerin, «Jeńis» JK sýpermarketti iske qospaqshy. 

«Sonymen qatar memlekettik qoldaý sharalary aıasynda «Damý» kásipkerlikti damytý qory» AQ arqyly nesıelendirý tetigi jasalyp, jalpy somasy 2,5 mlrd teńgege úsh saýda bazary («Altyn alma» bazary – 2 mlrd, «Baqyt jol» bazary – 300 mln, «Ónim» bazary – 200 mln teńge) jańǵyrtylmaqshy. Qazirgi tańda saýda bazarlary boıynsha eskızdik jobalardy ázirleý, tozyǵy jetken qurylystardy buzý, jańa saýda pavılondaryn ornatý jáne qaıta formattaý maqsatynda qujattamalardy daıyndaý júrgizilýde», - deıdi M.Qabdyǵalıev.

Basqarma derekterine qaraǵanda, bıylǵy birinshi jartyjyldyqta oblys boıynsha taýar aınalymynyń kólemi 4,5 trln teńge boldy. 

Eske sala keteıik, budan buryn Batys Qazaqstanda shaǵyn jáne orta kásipkerlikti qoldaýǵa 27 mlrd teńge bólinip otyrǵanyn jazǵan bolatynbyz.