Batys Qazaqstanda respýblıkalyq jol bóligi nelikten jóndelmeı qaldy
ORAL. KAZINFORM — Batys Qazaqstan oblysynda turǵyndar narazylyǵyn týdyryp otyrǵan joldar barshylyq. Sonyń biri – respýblıkalyq mańyzy bar Chapaev-Jalpaqtal-Kaztalov-RF shekarasy avtojolynyń 17 shaqyrym bóligi.
Oıqyl-shoıqyl jolmen júrý múmkin emes
Dálirek aıtqanda, Aqjaıyq aýdanynyń ortalyǵy Chapaev aýylynan bastalatyn 17 shaqyrym jol bóligi eshqandaı syn kótermeıdi.
Chapaev-Jalpaqtal jolynyń Kaztalov, shalǵaıdaǵy Bókeı ordasy jáne Jánibek aýdandary baǵytyndaǵy jolmen jalǵasatyny belgili.
Respýblıkalyq mańyzy bar Kaztalov-Jánibek-RF shekarasy jáne Kaztalov-Ónege-Bısen-Saıqyn joly sońǵy kezde ǵana salynyp bitkenimen, atalmysh 17 shaqyrymnyń oıqyl-shoıqyl jolǵa aınalǵanyna birneshe jyldyń júzi boldy.
Zańger, BQO qoǵamdyq keńesiniń múshesi Baýyrjan Ahmetjannyń málim etkenindeı, «QazAvtoJol» UK» AQ bıyl jazda Chapaev-Jalpaqtal jolynyń 17 shaqyrymy boıynsha memlekettik satyp alý konkýrsyn ótkizgen.
Tenderde «ASFA» JShS jeńimpaz atanǵanymen konkýrs boıynsha óz mindettemesin tolyq oryndamaǵan.
— «ASFA» JShS basshysy Ivan Enıýtın buryn oblystyq máslıhat depýtaty bolǵan. Jol salý baǵytynda tenderge kópten beri qatysyp keledi. Sońǵy 2023-2025 jyldary 4,8 mlrd teńge kóleminde kelisimshartqa qol qoıǵan. Sonyń ishinde 2,6 mlrd teńgesi Chapaev-Jalpaqtal jolynyń 17 shaqyrymyna tıesili. QazAvtoJol shartty buzyp, basqa merdigerge berýge tyrysqan. Biraq «ASFA» sotqa berip, kedergi bolyp otyr. Osylaısha, atalmysh joldy ortasha jóndeý bastalmady, — deıdi B.Ahmetjan.
Merdigermen sot qashanǵa deıin sozylmaq?
«QazAvtoJol» UK» AQ BQO fılıalynyń dırektory Asylbek Mardannyń naqtylaýynsha, respýblıkalyq mańyzy bar Chapaev-Jalpaqtal-Kaztalov-RF shekarasy avtomobıl jolynyń ýchaskesi úshinshi tehnıkalyq sanatqa jatady.
Onyń aıtýynsha, jobany Jol aktıvteri sapasynyń ulttyq ortalyǵynda vedomstvodan tys saraptamadan ótkizý úshin daıyndaý kezinde jol qabatynyń qatty shógip, tereń oıyqtar paıda bolǵany eskerildi.
Sondyqtan jobada 15 santımetrge deıin qalyńdyqta jańa materıaldy qosa otyryp, sýyq resaıklırleý jumystary, sondaı-aq tómengi qabatyna 6 santımetrge deıin iri túıirshikti jáne joǵary qabatyna 5 santımetrge deıin qıyrshyq tasty-mastıkalyq ystyq asfaltbeton tóseý qarastyryldy.
Sóıtip bıylǵy 15 shildede memlekettik satyp alý portalynda respýblıkalyq mańyzy bar Chapaev-Jalpaqtal-Kaztalov-RF shekarasy avtomobıl jolynyń 0-17 km ýchaskesine ortasha jóndeý júrgizý jobasy boıynsha konkýrsqa qatysý úshin ótinim qabyldaý bastalǵan.
Konkýrstyń 2025 jylǵy 31 shildedegi qorytyndy hattamasyna sáıkes «ASFA» JShS jeńimpaz bolyp tanylyp, 14 tamyzda shart jasaldy.
— Shart talaptaryna sáıkes merdiger shart jasalǵan kúnnen bastap on jumys kúni ishinde banktik kepildik usynýy tıis bolatyn. Alaıda bul talap oryndalmady. 28-29 tamyzda merdiger BQO mamandandyrylǵan aýdanaralyq ekonomıkalyq sotyna shartty buzý týraly talap aryz berdi. 2 qyrkúıekte sot talapty qamtamasyz etý týraly uıǵarymmen sharttyń kúshin ýaqytsha toqtatty. Bul uıǵarymǵa fılıal tarapynan jeke shaǵym berildi. 15 qyrkúıekte fılıaldyń ótinishi negizinde talapty qamtamasyz etý týraly 2 qyrkúıektegi uıǵarymnyń kúshi joıyldy. Qazirgi tańda talap aryz BQO mamandandyrylǵan aýdanaralyq ekonomıkalyq sotynda qaralyp jatyr, — deıdi A.Mardan.
Fılıal dırektorynyń habarlaýynsha, bul jobany bıyl júzege asyrý josparlanǵan bolatyn. Alaıda sottaǵy daý-damaıǵa baılanysty jumys 2026 jylǵa aýystyryldy.
«ASFA» JShS dırektory Ivan Enıýtın qazirgi kezde sot talqysy júrip jatqanyn, soǵan baılanysty eshteńe aıta almaıtynyn jetkizdi.
Turǵyndar talaby qandaı?
Sonymen, BQO turǵyndary arasynda «jyr» bolǵan Chapaev-Jalpaqtal-Kaztalov-RF shekarasy avtomobıl jolynyń 0-17 km bóligin jóndeý keıinge qalyp otyr.
BQO polıtsııa departamentiniń baspasóz hatshysy Nurjan Qýanǵalıdyń málimdeýinshe, bıylǵy toǵyz aıda Chapaev-Jalpaqtal jolynda 11 jol-kólik oqıǵasy bolyp, 3 adam qaza tapqan. 27-si túrli jaraqat alǵan.
— Týǵan jerimiz Bókeı ordasy aýdany Bısen aýyly bolǵandyqtan, jıi qatynaýǵa týra keledi. Sonda zýlap kele jatyp, Chapaev aýylyna jıyrma shaqyrymdaı jol qalǵanda jyldamdyqty amalsyz baıaýlatýǵa týra keledi. Óıtkeni oıdym-oıdym shuńqyrlardan qasha almaısyń. Keıde mashınańnyń astyn soǵyp alyp, synyp jatqanyń. Qosalqy bólshek izdep, kóligińdi jóndetip, qosymsha shyǵynǵa batasyń. Bul bir kúnniń oqıǵasy emes. Osylaı sozylyp kele jatqanyna áldeneshe jyl ótti. Sondyqtan 17 shaqyrym joldy retke keltiretin ýaqyt áldeqashan boldy ǵoı. Bul osyǵan qatysy bar mekemelerdiń jaýapkershiligi tómen ekendigin kórsetedi, — deıdi júrgizýshi Jarqyn Maǵzomov.
Eske sala keteıik, budan buryn BQO-da tenderdi jeńip alǵan depýtattyń kompanııasy jol salmaı otyrǵanyn jazǵan edik.