Batys Qazaqstanda Reseımen shekarada kólik keptelisi bolýy múmkin

ORAL. KAZINFORM – Reseı Federatsııasy Samara oblysymen shekarada ornalasqan «Syrym» avtomobıl ótkizý beketinde kólik keptelisi týyndaýy yqtımal. Bul Reseı tarapynan ekperımenttiń júrgizilýine baılanysty.

QR UQK BQO boıynsha Shekara qyzmeti departamentiniń málimetine sáıkes bıylǵy 1 jeltoqsannan 2026 jyldyń 30 maýsymyna deıin «Mashtakov» (RF) avtomobıl ótkizý beketinde jańa erejeler men sheteldik azamattar men azamattyǵy joq tulǵalardyń Reseı Federatsııasyna kirýi jáne shyǵýy sharttaryn aprobatsııalaý boıynsha eksperıment júrgiziledi.
Eksperımenttiń maqsaty — Reseı Federatsııasynyń memlekettik shekarasyn kesip ótetin kezde bıometrııalyq derekterdi jınaý (betiniń fotosýreti men saýsaq izi).

Eksperımentke mynalar kirmeıdi:

1. Belarýs Respýblıkasynyń azamattary.

2. Shet memleketterdiń dıplomattary men konsýldyq mekemeleriniń qyzmetkerleri, sondaı-aq olardyń otbasy músheleri.

3. Reseı Federatsııasynda bolý úshin arnaıy sharttary bar halyqaralyq uıymdardyń laýazymdy tulǵalary.

4. Dıplomatııalyq jáne qyzmettik pasporttardyń ıeleri.

5. 6 jasqa deıingi balalar.

BQO memlekettik kirister departamentinen málim etkenindeı, atalǵan eksperımenttiń júrgizilýine baılanysty «Syrym» avtomobıl ótkizý beketi arqyly jeńil jáne júk kólikteriniń qozǵalysyna ýaqytsha kedergi keltiriletin bolady. 

- Bul «Syrym» jáne «Mashtakov» beketteriniń ótkizý qabilettiligin aıtarlyqtaı tómendetedi. Sol sebepti memlekettik shekarany kesip ótýdi josparlap otyrǵan barlyq azamattardy «Aqsaı», «Shaǵan» jáne «Tasqala» avtomobıl ótkizý beketteri arqyly balamaly qozǵalys baǵyttaryn paıdalanýǵa shaqyramyz, - dep habarlady vedomstvodan. 

«Syrym» beketinde júk kólikteriniń keptelisteri osyǵan deıin de bolyp kelgeni belgili.
Eske sala keteıik, budan buryn BQO-da Reseımen shekarada júk kólikteriniń keptelisi týyndaǵanyn jazǵan bolatynbyz.