Batys Qazaqstanda referendýmda daýys berýge quqyly 450 myńnan astam azamat bar
ORAL. KAZINFORM – Batys Qazaqstan oblysynda 15 naýryzda ótetin referendýmǵa qatysty jumys isteıtin komıssııalar sany belgili boldy.
BQO aýmaqtyq referendým komıssııasynan málim etkenindeı, oblystyq, 13 aýdandyq jáne Oral qalalyq komıssııasyna qosa 489 ýchaskelik referendým komıssııalary jumys isteıdi.
Sonyń ishinde 136 ýchaskelik referendým komıssııasy Oral qalasynda ornalasqan.
Ýchaskelik komıssııalar 22 aqpanda azamattardyń tizimderin alyp, jumystaryna kirisedi. Oblys boıynsha referendýmda daýys berýge quqyly 450 myńnan astam azamat bar. Olardyń tizimi 22 aqpanda naqty anyqtalady.
BQO aýmaqtyq referendým komıssııasy QR Ortalyq referendým komıssııasynyń 2026 jylǵy 15 naýryzǵa belgilengen respýblıkalyq referendýmdy ázirleý men ótkizý jónindegi negizgi is-sharalarǵa qosa berilip otyrǵan kúntizbelik josparǵa sáıkes jumystardy atqarýda.
Buqaralyq aqparat quraldarynda jáne saıttarda aýmaqtyq jáne ýchaskelik referendým komıssııalarynyń quramy jáne referendým ýchaskeleriniń shekaralary týraly habarlar jarııalandy. Azamattardyń turǵylyqty jeri boıynsha qurylǵan ýchaskeler boıynsha referendýmǵa qatysýǵa quqyǵy bar azamattardyń tizimderi tanysýǵa usynylatyn bolady.
Sonymen qatar óńirde azamattardy naýqan týraly aqparattandyrý maqsatynda Ortalyq referendým komıssııasynyń 235 aqparattyq bılbordy ilindi. 49 LED ekran men sıtı ekrandarda tıisti rolıkter kórsetilýde. Rolıkter 3 telearna jáne 2 radıoarnadan da berilýde.
Oblystyq ınternet saıttar men oblystyq, aýdandyq gazetterde referendým týraly bannerler men modýlder ornalastyryldy.
Búgin «Azamattardyń konstıtýtsııalyq saılaý quqyqtaryn júzege asyrýdaǵy ózara is-qımyl týraly» quqyq qorǵaý organdarymen jumys otyrysy ótkizildi.
Onda BQO aýmaqtyq referendým komıssııasynyń tóraǵasy Ádil Jolamanov asa mańyzdy saıası naýqanǵa qatysty alda turǵan mindetterdi atap kórsetti.
Sondaı-aq BQO prokýrorynyń birinshi orynbasary Dáýren Omarǵalıev, BQO departamenti bastyǵynyń orynbasary Ernar Sultanǵalıev jáne basqalar oı-pikirlerimen bólisti.
Referendýmǵa qatysty otyrystar qalalyq jáne aýdandyq komıssııalarda da ótkizilip, negizgi is-sharalar belgilenip jatyr.
Eske sala keteıik, budan buryn 15 naýryzda Qyzylorda oblysynda 378 referendým ýchaskesi jumys isteıtinin jazǵan edik.