Batys Qazaqstanda referendým kúni 489 ýchaske jumys isteıdi
ORAL. KAZINFORM – Batys Qazaqstan oblysynda 503 referendým komıssııasy bolsa, sonyń 14-i – aýmaqtyq komıssııalar. Munda 98 adam, sonyń ishinde 46-sy turaqty negizde jumys isteıdi.
BQO aýmaqtyq referendým komıssııasynan málim etkenindeı, sondaı-aq 489 ýchaskelik referendým komıssııasy bar. Komıssııa músheleriniń sany – 3215.
Solardyń ishinde 2905 adamnyń, ıaǵnı 90,3 paıyzynyń úlken elektoraldyq naýqandardy ótkizý tájirıbesi bar. Komıssııa múshelerin oqytý turaqty túrde júrgizildi. 25 aqpannan bastap oblystyq aýmaqtyq komıssııanyń músheleri aýdandar men Oral qalasynyń ýchaskelik referendým komıssııalarynyń múshelerin jergilikti jerlerge shyǵyp oqytty. Ýchaskelik komıssııa músheleri kaskadtyq ádispen úsh kezeńde túgel oqytyldy.
Aýmaqtyq komıssııalardyń quramy men ýchaskelerdiń shekaralary buqaralyq aqparat quraldary men ákimdikterdiń saıttarynda jarııalandy.
Komıssııa málimetine qaraǵanda, oblys aýmaǵyndaǵy 489 ýchaskeniń 136-sy (27,8 paıyzy) oblys ortalyǵynda ornalasqan, jabyq úlgidegi ýchaskelerdiń sany – 14 (sonyń ishinde bireýi áskerı bólimde, bireýi ýaqytsha ustaý ızolıatorynda jáne 12-si emdeý mekemelerinde).
2025 jyly 8 jańa saılaý ýchaskesi qurylyp, saılaýshylar sany az 15 saılaý ýchaskesi jabyldy, 48 saılaý ýchaskesiniń shekaralary ózgertildi. Bul ózgerister týraly azamattarǵa ýaqytyly habarlandy.
Ýchaskelerdiń 243-i bilim berý mekemelerinde, 181-i mádenıet, 33-i densaýlyq saqtaý, 17-i sport nysandarynda, úsheýi áleýmettik mekemelerde jáne qalǵan 12-si ózge nysandarda ornalasqan.
Aýdandardaǵy referendým ýchaskeleriniń barlyq orynjaılary talaptarǵa saı keledi, daýys berý jáshikterimen, aqparattyq materıaldarmen qamtylǵan.
Óńirde QR Ortalyq referendým komıssııasynyń hatshysy Shavhat Ótemisovtiń tóraǵalyǵymen respýblıkalyq referendýmdy ázirleý men ótkizý máseleleri jergilikti atqarýshy jáne quqyq qorǵaý organdary, memlekettik mekemeler ókilderiniń, aýmaqtyq referendým komıssııa tóraǵalarynyń qatysýymen ótken keńeste jan-jaqty talqylandy. Osyndaı keńesti oblystyq aýmaqtyq referendým komıssııasy aýdandar men Oral qalasynda ótkizdi.
Daýys berý kezinde erekshe jaǵdaılardy qajet etetin múgedektigi bar 2 254 adam esepke alynǵan (kreslo-arbalardy paıdalanatyndar – 538, kórýi boıynsha múgedekter – 1 266, estýi boıynsha múgedektigi bar - 450). Bul sanattaǵy daýys berýshilerge jaǵdaılar jasalǵan, barlyq ýchaskeleri 1-qabatta ornalasqan. Referendým ýchaskeleri geo málimetterimen QR Eńbek jáne halyqty áleýmettik qorǵaý mınıstrliginiń inva.gov.kz múgedektigi bar adamdardy áleýmettik qorǵaý týraly aqparattyq portalyna engizildi. Daýys berý kúni Oral qalasy men aýdandarda ınvataksı qyzmeti uıymdastyrylatyn bolady. Oblys boıynsha 78 avtokólik bar, sonyń 10-y arnaıy quraldarmen jabdyqtalǵan.
Oblystyq, aýdandyq jáne Oral qalalyq aýmaqtyq referendým komıssııalary janyndaǵy múgedekterdiń saılaý quqyqtaryn qamtamasyz etý jónindegi jumys toptary ýchaskelerdiń qoljetimdiligine qoǵamdyq uıym jáne BAQ ókilderimen birge monıtorıng júrgizdi. Monıtorıng qorytyndysy boıynsha qosymsha sharalar qabyldandy.
Ýchaskelik referendým komıssııalary jergilikti atqarýshy organdardan tizimder alyp, bıylǵy 22 aqpannan bastap jumystaryna kiristi. Referendýmǵa qatysý quqyǵy bar azamattardyń sany – 446 391 adam. Kúntizbelik josparǵa saı daýys berý ýaqyty men orny týraly azamattar habardar etiledi, ıaǵnı shaqyrý qaǵazdary úlestirilip, referendýmǵa qatysýǵa shaqyryldy.
Daýys berý kúni qarsańynda barlyq referendým ýchaskelerinde 11 naýryz kúni biryńǵaı «Ashyq esik» kúni ótkizildi. Bul kúni ýchaske tóraǵalary azamattarǵa referendým zańnamalaryn qosymsha túsindirip, keńes berip, daýys berý erekshelikteri týraly áńgimelep berdi. Aqparattandyrý maqsatynda oblysta 14 koll-ortalyq uıymdastyrylǵan, Telegram-bot jáne JSN boıynsha daýys berý ýchaskesin izdeý qyzmeti iske qosyldy. Qoǵamdyq oryndarda LED-ekrandarda beınerolıkter men aýdıorolıkter taratylýda.
Oblystyq referendým komıssııasynyń Facebook, Instagram jáne Telegram paraqshalarynda jáne oblystyq «Jas saılaýshylar klýbynyń» paraqshasynda referendým komıssııasynyń resmı saıtynda respýblıkalyq referendým týraly aqparattyq materıaldar, beınerolıkter men aýdıorolıkter jarııalanýda. Naýqandy aqparattyq súıemeldeýdiń tolqyndaryna sáıkes túsken modýldar, ınfobannerler jáne ınfrografıkalar 2 oblystyq, 12 aýdandyq, 3 qalalyq gazetterde ornalastyryldy. «Jibek joly», «Aqjaıyq», TDK-42, «Qarashyǵanaq» telearnalarynda referendýmdy ázirleý jáne ótkizý kezeńderi týraly beınesıýjetter men rolıkter efırge berildi. Batys Qazaqstan oblystyq jáne «Aqsaı» radıoarnalarynda tıisti aqparattyq kontent turaqty jarııalanyp turady. Aýmaqtyq komıssııanyń resmı paraqshalarynda jarııalanǵan referendým týraly materıaldarǵa oqyrmandardyń yqylasy joǵary. Aıtalyq, Feısbýk paraqshasynda jarııalanǵan aqparattyq materıaldarmen jyl basynan beri 380 myń oqyrman tanysqan.
Turǵyndarǵa «Telegram», «WhatsApp» chattary arqyly da habarlaý jumysy uıymdastyrylmaq.
- Daýys berýshileri 1 myńnan asatyn 199 ýchaskede onlaın servıs qyzmeti jáne oblys ortalyǵynyń 5 ýchaskesinde azamattardy tirkeý servısteri uıymdastyrylatyn bolady. Daýys berý quqyǵyn beretin 4464 dana esepten shyǵarý kýáligi daıyndalyp, 27 aqpannan bastap berilýde. Búgingi tańda aýdandar men Oral qalasynda Ortalyq referendým komıssııasynyń aqparattyq bannerlerin ornalastyrý úshin 260 oryn belgilenip, barlyǵyna referendým ótetindigi jóninde aqparattar ilindi. Oblys boıynsha jarǵylyq qyzmetine saılaýdy baıqaý jónindegi qyzmetti júzege asyrý jatatyn 23 qoǵamdyq birlestik pen kommertsııalyq emes uıym akkredıttelgen, - dep habarlady BQO aýmaqtyq referendým komıssııasy.
Eske sala keteıik, budan buryn Batys Qazaqstanda referendýmda daýys berý quqyǵy bar 450 myńnan astam azamat bar ekendigin jazǵan bolatynbyz.
Sondaı-aq Oral qalasynda referendým kúni qoǵamdyq kólikter tegin júretini habarlandy.