Batys Qazaqstanda iri qara mal basy 715 myńǵa jetkizilmek

ORAL. KAZINFORM — Batys Qazaqstan oblysynda barlyq sharýashylyq sanattarynda iri qarany 715 myńǵa, usaq maldy 1 mln 213 myń basqa jetkizý kózdelip otyr.

BQO aýyl sharýashylyǵy basqarmasynyń basshysy Jasulan Halıýllınniń málim etkenindeı, tuqymdyq túrlendirýmen qamtylǵan analyq mal basynyń úlesin 80 paıyzǵa jetkizip, 1 300 bas asyl tuqymdy maldy ımporttaý oılastyrylýda. 

Jasulan Joldybaıulynyń sózine qaraǵanda, sonymen qatar «Aýyl amanaty» baǵdarlamasy aıasynda 5,5 mlrd teńgeni 815 adamǵa shaǵyn nesıe retinde berý arqyly 886 jumys ornyn ashý josparlanýda.

— Memleket basshysy Qasym-Jomart Toqaev Úkimettiń keńeıtilgen otyrysynda sóılegen sózinde ınvestıtsııalyq saladaǵy jumysty kúsheıtý kerektigin atap kórsetti. Osy oraıda oblys boıynsha aýyl sharýashylyǵy salasynda 14,4 mlrd teńgege 12 ınvestıtsııalyq joba júzege asyrylmaqshy, — deıdi J.Halıýllın.

Onyń aıtýynsha, qazirgi tańda óńirde mal qystaǵy qalypty ótip jatyr. Aldyńǵy jyldan qalǵan qaldyq shópti eseptegende, barlyǵy 2 128 myń tonna (2023 jyly — 2 439 myń tonna) pishen daıyndalǵan bolatyn, bul — qajettiliktiń 105 paıyzy.

Oǵan qosa qystaqqa 233,2 myń tonna (2023 jyly — 185,5 myń tonna) jem azyǵy, 8,9 myń tonna (2023 jyly — 3,4 myń tonna) pishendeme, 20,5 myń tonna (2023 jyly — 9,8 myń tonna) súrlem, 15,8 myń tonna (2023 jyly — 15,7 myń tonna) saban ázirlendi.

— Ótken jyly Bókeı ordasy, Jánibek aýdanynda, sondaı-aq Jańaqalada 5, Kaztalovta 5 aýyldyq okrýgte qýańshylyq bolǵany málim. Osyǵan baılanysty agroqurylymdarǵa aýyl sharýashylyǵy janýarlarynyń analyq basynyń azyǵyna jumsalǵan shyǵyndar qunyn arzandatýdy sýbsıdııalaý jumystary júrgizildi. Bul maqsatqa jergilikti bıýdjet esebinen 3,6 mlrd teńge bólindi. Budan bólek, Bókeı ordasy jáne Jánibek aýdandarynyń jeke qosalqy sharýashylyqtary mal azyǵymen qamtyldy. Olarǵa mal azyǵyn tasymaldaý shyǵynyn óteý úshin jergilikti qazyna rezervinen 531 mln teńge qaraldy. Sonyń nátıjesinde mal azyǵyn daıyndaı almaǵan 2 467 aýlaǵa 59 267 rýlon shóp jáne 1 863 tonna jem jetkizildi. Bul mal baqqan aǵaıyn úshin úlken kómek boldy, — dedi J.Halıýllın.

Eske sala keteıik, budan buryn Batys Qazaqstanda sharýalar mal qystaǵyna qanshalyqty daıyn ekendigin jazǵan bolatynbyz.