Batys Qazaqstanda polıtsııaǵa kúsh qoldanǵandar jaýapqa tartyldy
Batys Qazaqstan oblysynda bılik ókiline baǵynbaı, polıtsııa qyzmetkerine kúsh qoldanǵandar jaýapqa tartyldy, dep habarlaıdy QazAqparat tilshisi.
BQO polıtsııa departamenti tergeý basqarmasynyń bólim basshysy, polıtsııa podpolkovnıgi Erlan Álıevtiń aıtýynsha, keıbir adamdar polıtsııa qyzmetkerleriniń bılik ókili ekendigin eskermeı, olardyń zań aıasynda talap etkenderine baǵynbaı, elemeýshilik tanytady.
Erlan Talapqalıulynyń sózine qaraǵanda, bılik ókiline baǵynbaǵandar QR Qylmystyq kodeksiniń 379-babyna sáıkes asa iri kólemdegi aıyppul tóleýden bastap eki jylǵa deıingi merzimge bas bostandyǵynan aıyrý jazasyna tartylady.
Sonymen qatar bılik ókiline qatysty qorqytý nemese kúsh kórsetý de jazasyz qalmaıdy. Osyǵan qatysty jyl basynan beri QR QK 380-babyna sáıkes 14 derek tirkelip, sonyń ishinde qylmys quramynyń bolmaýyna baılanysty 2 is qysqartylyp, jeteýi sotqa joldandy. Bul bapqa sáıkes aıypty dep tanylǵandar (bılik ókiliniń óz qyzmettik mindetterin atqarýyna baılanysty odan kek alý maqsatynda oǵan nemese jaqyndaryna qatysty óltirýmen, densaýlyqqa zııan keltirýmen, múlkin búldirýmen nemese joıýmen qorqytý) eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa deıin jaýapqa tartylady.
Sol sekildi QR QK 378-babyna sáıkes bılik ókilin óz qyzmettik mindetterin atqarý kezinde nemese olardy atqarýyna baılanysty qorlaýǵa barǵandar seksen aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne seksen saǵatqa deıingi merzimge qoǵamdyq jumystarǵa tartýǵa ne jıyrma táýlikke deıingi merzimge qamaqqa alýǵa jazalanady. Bul bap boıynsha 23 is tirkelip, sonyń jeteýi sotqa joldandy. 3 qylmystyq is óndirispen qysqartyldy.
E.Álıev zań júzinde tártipke baǵynbaǵan adamdarǵa qatysty sotqa deıingi tergep-tekserýdiń biryńǵaı tizilimine tirkelgen derekterdiń birqataryna toqtaldy.
Mysaly, sot sheshimi shyqqan oqıǵanyń biri bıylǵy 4 naýryz kúni túngi saǵat 04.00-de boldy. Oral qalasyndaǵy E.Brýsılovskıı kóshesinde Oral qalasy polıtsııa basqarmasy Shaǵan polıtsııa bólimi jergilikti polıtsııa qyzmetiniń ýchaskelik polıtsııa ınspektory, polıtsııa leıtenanty men onyń kómekshisi qolyna ishimdik ustap, shaıqalyp bara jatqan adamdy kórip, zań tártibin túsindire bastaıdy. Alaıda álgi turǵyn tártip saqshylaryn elemeı, balaǵattap, suraq-jaýap alý kezinde polıtsııa qyzmetkeriniń ar-namysan tıetin aýyr sózder aıtqan. Keıin osy áreketi úshin Zachagan kentiniń 1987 jylǵy turǵyny QR QK 378-baby 1-bóligi (bılik ókilin óz qyzmettik mindetterin atqarý kezinde nemese olardy atqarýyna baılanysty qorlaý) jáne 380-baby 3-bóligine (bılik ókiline qatysty qorqytý nemese kúsh kórsetý áreketteri) sáıkes zań aldynda jaýap berdi.
Taǵy bir derek, Oral qalasy polıtsııa basqarmasynyń qyzmetkeri, polıtsııa kishi serjanty ortalyq bazarda jaıaý patrýldeý kezinde belgisiz bireýdiń óz avtokóligin kólik turaǵyndaǵy arnaıy múgedek belgisi kórsetilgen tyıym salynǵan jerge qoıǵanyn kórgen. Soǵan sáıkes QR Ákimshilik quqyqbuzýshylyq kodeksi 597-baby 4-bóligine sáıkes hattama toltyrý úshin kólik qujattaryn suraǵanda, álgi adam kelispeı, tártip saqshysyna qarsylyq tanytqan. Biraq toltyrylǵan hattamaǵa narazylyq bildirgen ol polıtsııa qyzmetkeriniń talaptaryna baǵynbaı, balaǵat sózder aıtyp, qoqan-loqqy kórsetken. Tipti qyzmettik mindetin atqarý barysynda júrgen tártip saqshysyna qarsy kúsh qoldanyp, dene jaraqatyn keltirgen. Nátıjesinde polıtsııa qyzmetkerine qarsy kúsh qoldanǵany úshin qajetti materıaldar men anyqtamalar jınaqtalyp, is sotqa joldandy.
Osyǵan uqsas oqıǵa 4 tamyz kúni tirkeldi. Kezekshi bólimge Oral qalasynda Jambyl kóshesi boıyndaǵy úılerdiń biriniń aýlasynda birneshe adamnyń ishimdik iship, janjaldasyp jatqany týraly habar túsken. Oqıǵa ornyna kelip jetken polıtsııa qyzmetkerleri quqyq buzýshylarǵa zań talaptaryn túsindire otyryp, túngi ýaqytta ishimdik iship, buzaqylyqqa barǵandarǵa qatysty QR Ákimshilik quqyqbuzýshylyq kodeksiniń 440 jáne 437-baby boıynsha ákimshilik hattama toltyratyndaryn aıtady. Alaıda buǵan kelispegen quqyq buzýshylar tártip saqshylaryn balaǵattap, qarsy shyǵyp, olarǵa dene jaraqattaryn keltirgen. Aqyry QR QK 378-baby (bılik ókilin qorlaý), 379-baby (bılik ókiliniń zańdy talabyna nemese ókimine baǵynbaý) jáne 380-babyna (bılik ókiline qatysty kúsh qoldaný) sáıkes B. esimdi azamat qylmystyq jaýapkershilikke tartyldy.
«Quqyqtyq tártipti saqtaý ár adamnyń jeke basynyń jaýapkershiligine, quqyqtyq saýattylyǵyna baılanysty. Tártip saqshylaryna qatysty quqyqqa qaıshy is-áreketterge jol bergen kisi kim bolsa da, ákimshilik nemese qylmystyq jaýapkershilikke tartylatynyn eskergenderi jón», - dep túıindedi sózin E.Álıev.
