Batys Qazaqstanda fabrıkada pasterellezden qus qyrylyp qaldy

ORAL. KAZINFORM – QR AShM Veterınarlyq baqylaý jáne qadaǵalaý komıteti BQO aýmaqtyq ınspektsııasynan málim etkenindeı, oqıǵa Báıterek aýdany Baıqonys aýyldyq okrýgi Novenkıı aýylynan 1 shaqyrym qashyqtyqta ornalasqan «Aqas» agrofırmasy» JShS qus fabrıkasynda ótken jeltoqsan aıynyń aıaǵynda bolǵan.

Батыс Қазақстанда пастереллезден құс өлімі тіркелді
Фото: Мухтор Холдорбеков/Kazinform

Astana qalasyndaǵy atalǵan komıtetke qarasty «Veterınarııa jónindegi ulttyq referenttik ortalyǵynda» júrgizilgen zerthanalyq zertteý qorytyndysyna sáıkes pasterellez dıagnozy rastaldy.

Inspektsııadan túsken málimetke qaraǵanda, pasterellez anyqtalǵannan keıin Baıqonys aýyldyq okrýginiń 31 jeltoqsandaǵy sheshimimen qus fabrıkasy aýmaǵynda shekteý sharalary engizildi. QR Aýyl sharýashylyǵy mınıstri mindetin atqarýshynyń «Veterınarııa salasyndaǵy tergep-tekserý júrgizý qaǵıdalaryn bekitý týraly» 2024 jylǵy 28 maýsymdaǵy № 231 buıryǵyna sáıkes Báıterek aýdandyq aýmaqtyq ınspektsııasy «Aqas» agrofırmasy» JShS qus fabrıkasyna qatysty tekserý júrgizip jatyr.

Shekteý sharalarynyń engizilýine baılanysty «Veterınarııa týraly» Zańnyń 11-baby 1-bóligi 1-tarmaǵyna sáıkes «Respýblıkalyq epızootııaǵa qarsy otrıad» BQO fılıaly ýákiletti organ bekitetin tizbege engizilgen janýarlardyń asa qaýipti aýrýlarynyń oshaqtaryn joıý jumystaryn atqaryp jatyr. 

— Inspektsııa 6 qańtarda Batys Qazaqstan oblysynyń qus sharýashylyqtarymen dóńgelek ústel otyrysyn ótkizip, onda epızootııaǵa qarsy sharalar (qus aýrýyna qarsy vaktsınatsııalaý), sondaı-aq qustyń juqpaly aýrýlaryna jol bermeý maqsatynda veterınarııalyq-sanıtarlyq talaptar túsindirildi. «Aqas» agrofırmasy» JShS qus fabrıkasy jeke menshikte bolǵandyqtan, ınspektsııa onyń kásipkerlik qyzmetine aralasa almaıdy. Báıterek aýdanynda epızootııalyq jaǵdaı turaqty. Qus fabrıkasyna taıaý jerdegi Novenkıı aýylynda monıtorıng júrgizilýde. Sodan keıin qus ólimi tirkelgen joq, — dep habarlady vedomstvodan.

Eske sala keteıik, budan buryn BQO-da aýyl turǵynynan sibir jarasy anyqtalǵanyn jazǵan edik.

Сейчас читают