Batys Qazaqstanda ózennen 300-den astam kıiktiń óleksesi shyǵaryldy
ORAL. KAZINFORM — Batys Qazaqstan oblysy Kaztalov aýdany aýmaǵynda Saryózende ólgen kıikten tazartý jumystary júrgizildi.
BQO orman sharýashylyǵy jáne janýarlar dúnıesi aýmaqtyq ınspektsııasynyń basshysy Nurlan Rahymjanovtyń málim etkenindeı, keshe Saryózende kıik ólekseleri qalqyp júrgeni jóninde habar túskennen keıin oqıǵa ornyna «Bókeıorda» tabıǵı rezervatynyń qyzmetkerleri avtokólikterimen bardy.
— Olar Qaraoba aýyldyq okrýg ákimdigi jáne aýdandyq TJ bóliminiń qyzmetkerlerimen birge ózennen 308 kıik óleksesin alyp shyqty. Bulardyń barlyǵy da — aqbókenniń bıylǵy tólderi. Bıiktigi 40-50 santımetrdeı jyradan shyǵa almaı qalǵan. Sodan keıin kıik ólekseleri aýyldyq okrýgtegi mal molasynda algorıtmge saı órteý ádisimen joıylyp, hattama toltyryldy, — dedi N.Rahymjanov.
Inspektsııa basshysy osy tusta kezekshilik nege qoıylmaıdy degen áńgimeniń bar ekendigin jetkizdi. Onyń aıtýynsha, kıik bir ǵana jerden ótpeıdi, ózenniń barlyq boıynda kezekshilik qoıý múmkin emes. Ekinshiden, onshaqty kúnnen keıin kıiktiń quralaılary óskennen soń sýdan óte beretin bolady.
Eske sala keteıik, budan buryn Batys Qazaqstanda sýǵa batqan 560-tan astam kıik óleksesi joıylǵanyn jazǵan bolatynbyz.