Batys Qazaqstanda órtten keltirilgen shyǵyn 2,9 esege ósti
ORAL. KAZINFORM — Batys Qazaqstan oblysynda jyl basynan beri 721 órt oqıǵasy tirkeldi.
BQO TJD memlekettik órt baqylaý basqarmasynyń bastyǵy Mereke Jumaǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, 20 jeltoqsandaǵy málimet boıynsha bul ótken jylǵy osy kezeńdegiden (554) 30,1 paıyzǵa kóp.
Mereke Baýyrjanulynyń sózine qaraǵanda, órt saldarynan 5 adam (2023 jyly — 10) qaza taýyp, 11-i (2023 jyly — 11) túrli jaraqat aldy. Órtten keltirilgen 473 mln 421,5 myń teńgege jetip, ótken jylǵydan (157 mln 850 myń teńge) 2,9 esege asyp tústi.
— Bıylǵy 1 jeltoqsannan bastap Tótenshe jaǵdaılar mınıstriniń buıryǵyna sáıkes elimizde órt qaýipsizdigi aılyǵy ótkizilýde. Tótenshe jaǵdaılarǵa jol bermeý maqsatynda departament qyzmetkerleri jergilikti atqarýshy jáne múddeli memlekettik organdarmen, eriktilermen, blogerlermen jáne buqaralyq aqparat quraldarymen birlesip, keń aýqymdy profılaktıkalyq jumystar júrgizýde, — deıdi M.Jumaǵalıev.
Onyń aıtýynsha, jańa jyl qarsańynda halyqtyń túrli pırotehnıkalyq buıymdardy paıdalanýyna baılanysty tótenshe jaǵdaılardyń týyndaý qaýpi bar. Mundaı buıymdardy durys qoldanbaý jáne qarapaıym erejelerdi saqtamaý sońy qaıǵyly oqıǵalarǵa soqtyrýy yqtımal.
— Jańa jyldyq is-sharalardy ótkizý kezinde órt qaýipsizdigi talaptaryn saqtaý asa mańyzdy. Qazirgi tańda jańa jyldyq merekelerdi ótkizetin 400 nysan esepke alynǵan. Sonyń 354-i nemese basym kópshiligi — bilim berý uıymdary. Osy nysandardyń órtke qarsy jaı-kúıi tekserildi. Jańa jyl qarsańynda BQO TJ departamenti órt qaýipsizdiginiń barlyq sharalaryn qatań saqtaý kerektigin eske salady, — dedi M.Jumaǵalıev.
Eske sala keteıik, budan buryn Aqsaıda turǵyn úıde órt saldarynan 2 bala, 1 áıeldiń jansaqtaý bólimine jatqyzylǵanyn jazǵan bolatynbyz.