Batys Qazaqstanda órtengen úı ishinde quran janbaı qalǵan
ORAL. KAZINFORM — Batys Qazaqstan oblysy Báıterek aýdany Baıqonys aýylynda qos qabatty úı órtendi.
BQO TJ departamentiniń baspasóz qyzmetinen málim etkenindeı, oqıǵa 19 tamyz kúni saǵat 10.46-da Muhıt kóshesi 42-mekenjaıda boldy.
«Qos qabatty úıde 80 sharshy metr aýmaqta eki jatyn jáne ishinara qonaq bólmesi, jıhaz jáne jeke zattar janǵan. «Tilsiz jaý» saǵat 11.28-de oqshaýlanyp, 12.02-de aýyzdyqtaldy. Zardap shekkender joq. Aldyn ala málimet boıynsha órt elektr symdarynyń qysqa tuıyqtalýynan shyqqan», dep habarlady vedomstvodan.
Aýyl turǵyndarynyń sózine qaraǵanda, otqa oranǵan úı ishinde quran janbaı qalǵan.
Baıqonys aýyldyq okrýginiń ákimi Almas Qońyrov oqıǵany rastady.
«Aýyldyq okrýg ákimdiginiń mamandary órt sóndirýshilermen birge anyqtady. Basqa zattar janyp ketse de, órtenbegen quran tabylǵan», dedi Kazinform tilshisine A.Qońyrov.
Tanystarynyń aıtýynsha, atalmysh úıde áıel enesimen jáne úsh balasymen turǵan. Olardyń jalǵyz baspanasy janyp ketkendikten, úlken zııanǵa qalǵan.
Qazirgi kezde úıdi qalpyna keltirý úshin qarjy jınalýda.
Eske sala keteıik, budan buryn Batys Qazaqstanda 1 myń gektar aýmaqta shóp órtengenin jazǵan bolatynbyz.
