Batys Qazaqstanda ormandaǵy órtti sóndirýge tikushaq tartyldy
ORAL. KAZINFORM — Batys Qazaqstan oblysy Báıterek aýdany Baıqonys aýyly tusynda orman otqa orandy.
BQO TJ departamentiniń baspasóz qyzmetinen málim etkenindeı, oqıǵa 26 shilde kúni ıAnvartsev orman jáne janýarlar dúnıesin qorǵaý jónindegi kommýnaldyq memlekettik mekemesi aýmaǵynda boldy.
Oqıǵa ornyna TJD kúsh-quraldary dereý jiberildi. «Tilsiz jaýdy» aýyzdyqtaý qatty tútin men kúshti jelge baılanysty kúrdelendi.
Turǵyndar qaýipsizdigin qamtamasyz etý maqsatynda qutqarýshylar orman sharýashylyǵy mekemesi qyzmetkerlerimen birge Jaıyq ózeni jaǵalaýynan 7 jeńil avtokólikti qaýipsiz jerge shyǵardy. Onda 24 demalýshy boldy, sonyń ishinde jeteýi – balalar.
- Barlyq qyzmetterdiń birlesken is-qımyly nátıjesinde shamamen 16,9 gektardaǵy órt tolyqtaı sóndirildi. Oǵan TJD jáne orman sharýashylyǵy kúshteri, QR TJM 20982-áskerı bólimi 2-qutqarý batalony, erikti órtke qarsy qurylymdar, sondaı-aq «Qazormanqorǵaý» tikushaǵy tartyldy. Ystyq aýa raıy jáne qurǵaqshylyqqa baılanysty TJ departamenti turǵyndar men qonaqtarǵa órt qaýipsizdigi talaptaryn qatań saqtaý kerektigin eske salady, - dep habarlady vedomstvodan.
Turǵyndardyń aıtýynsha, búgin Zachagan kentinde qatty turmystyq qaldyqtar polıgony jaqta qalyń tútin qaladan kórinip tur.
Kúnniń ystyǵy men kúshti jelge baılanysty Oral qalasynyń keıbir aýdandarynda elektr jaryǵy da álsin-álsin óship tur.
Oral qalasy ákimdiginiń málimetine qaraǵanda, búgin 800-deı abonent elektr jaryǵynsyz qaldy. Apatty qalpyna keltirý jumystary júrgizilip jatyr.
Eske sala keteıik, budan buryn Batys Qazaqstanda segiz jaǵajaı qaýipsizdik talaptaryna saı kelmeı turǵanyn jazǵan edik.
