Batys Qazaqstanda orman aǵashtarynyń otalyp jatqany ras pa
ORAL. KAZINFORM — Batys Qazaqstan oblysy Terekti aýdany Shaǵan aýyldyq okrýgi aýmaǵynda orman aǵashtarynyń otalyp jatqany jóninde beınejazba taraldy.
Turǵyndardyń sózine qaraǵanda, Uzynkól men Barbastaý eldi mekenderi arasyndaǵy tórt-bes toǵaı beldeýi túgeldeı alynyp tastalǵan. Іshinde adamdar jemisin teretin qaraqat butalary da bar.
Osy máselege oraı Kazinform tilshisi tıisti mekemelerge habarlasqan edi.
Shaǵan aýyldyq okrýginiń ákimi Erbol Iseevtiń málimdeýinshe, «Kóbensaı» aýyl sharýashylyǵy óndiristik kooperatıvi 2021 jyly qurylǵan. 2024 jyldan beri Shaǵan aýyldyq okrýginiń aýmaǵynda 575 gektar jerde ósimdik sharýashylyǵymen aınalysady. Kópjyldyq shóp, sýdan, sorgo ósiredi.
— Qazirgi kezde kókónis, baý-baqsha ónimderin óndirý jáne mal sharýashylyǵy úshin azyqtyq daqyldar ósirý jobasyn júzege asyrýda. Soǵan sáıkes aýyl sharýashylyǵy jerin ózdiginen ósken aǵashtardan tazartý jumystaryn júrgizýde, — dedi E.Iseev.
Terekti aýdany turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Qaıyrjan Esetovtiń naqtylaýynsha, «Ósimdikter dúnıesi týraly» QR Zańynyń 4-babyna sáıkes jeke menshiktegi jerlerde ósetin ósimdikterdi zańnamaǵa sáıkes jekemenshik sýbektileri paıdalana alady. ıAǵnı óz jerinde ósken aǵashtardy otaı ma, paıdalana ma, ózderi biledi.
Eske sala keteıik, budan buryn Batys Qazaqstanda egilgen mıllıondaǵan aǵash nege jersinbeı qýrap ketetinin jazǵan bolatynbyz.
Sondaı-aq emhana aldyndaǵy skver saqtala ma, osyǵan oraı BQO densaýlyq saqtaý basqarmasy jaýap berdi.
